Balla: Ne nuk bëjmë avokatin e askujt, drejtësia duhet mbështetur. Edhe 100 herë të kthehem pas, të njëjtin kallëzim për Sali Berishën do ta bëja prapë

Kreu i Grupit Parlamentar Socialist, Taulant Balla, në fjalën e tij në Kuvend pas raportimit të kreut të SPAK, Altin Dumani, deklaroi se mazhoranca mbetet e vendosur në mbështetje të institucioneve të drejtësisë dhe të reformës që po jep rezultate konkrete.

“Ja dhe ky raportim mbaroi, dhe qytetarët me të drejtë dinë të bëjnë dallimin e madh,” tha Balla, duke theksuar se Partia Socialiste nuk bën “avokatin e askujt”, as kur bëhet fjalë për njerëz të afërt politikisht.

“Nuk bëjmë avokatin e askujt, as të atyre që hetohen apo arrestohen, edhe kur ne nuk na duket e drejtë. Ndërsa ju, në vend që të flisni për drejtësinë, u përpoqët të tregoni kush e do më shumë udhëheqësin tuaj. Sot interesi i Shqipërisë është të mbështesim institucionet e drejtësisë,” u shpreh Balla.

Ai vlerësoi punën e Prokurorisë së Posaçme, duke theksuar se krimi i organizuar ka marrë goditje të forta dhe se ky proces duhet të vazhdojë pa pengesa. Balla kritikoi gjithashtu reagimet e opozitës në sallë gjatë kohës që në foltore ishte Altin Dumani.

“E rëndësishme është që të dëshmojmë shtetari, sa i takon marrëdhënieve me institucionet. Ajo që bëri sot ai që ka marrë peng partinë tuaj, duke kaluar në fyerje personale ndaj prokurorit dhe atij që ka bërë kallëzimin, është e papranueshme. Dhe një gjë po ua them: edhe 100 herë të kthehem pas, të njëjtin kallëzim për Sali Berishën do ta bëja prapë,” deklaroi Balla.

Kreu i grupit socialist nënvizoi rëndësinë e respektimit të prezumimit të pafajësisë dhe kritikoi përdorimin e tepruar të masave të paraburgimit, duke kujtuar se Shqipëria është ndër vendet me numrin më të lartë të tyre.