I dërguari special i Shteteve të Bashkuara, Steve Witkoff, dhe Jared Kushner, dhëndri i presidentit amerikan Donald Trump, pritet të vizitojnë për herë të parë Kievin në kuadër të përpjekjeve diplomatike për t’i dhënë fund luftës në Ukrainë.
Sipas raportimeve, marrëveshja për vizitën u arrit pas takimit të fundit mes presidentit amerikan Donald Trump dhe presidentit ukrainas Volodymyr Zelensky në Uashington.
Vizita shihet si një sinjal i përmirësimit të marrëdhënieve mes dy vendeve, pas një periudhe tensionesh që kishin karakterizuar raportet mes Trump dhe Zelenskyt.
Sipas Financial Times, në biseda private Zelensky ua ka atribuar ndryshimin e qëndrimit të Trump ndaj luftës në Ukrainë muajve të tërë të kontakteve të drejtpërdrejta mes këshilltarëve të të dy presidentëve.
Burime pranë dy liderëve bëjnë të ditur se strategjia e presidentit ukrainas ka qenë të bindë Trump se mbështetja për Ukrainën është në interes të Shteteve të Bashkuara dhe se një sukses i Kievit do të përbënte edhe një sukses politik për presidentin amerikan.
Sipas të njëjtave burime, ky argument ka fituar gjithnjë e më shumë terren gjatë muajve të fundit.
Financial Times thekson gjithashtu se Trump është bërë më kritik ndaj qëndrimit të presidentit rus Vladimir Putin dhe më i prirur të vlerësojë sukseset e Ukrainës në fushën e betejës.
Megjithatë, mbështetja për Kievin vazhdon të hasë rezistencë brenda një pjese të lëvizjes “America First”, ku disa nga aleatët politikë të Trump mbeten skeptikë ndaj angazhimit afatgjatë të SHBA-së në mbështetje të Ukrainës.
Vizita e planifikuar e Witkoff dhe Kushner në Kiev konsiderohet një hap i ri në përpjekjet diplomatike të administratës amerikane për të nxitur negociatat dhe për të arritur një zgjidhje të konfliktit mes Ukrainës dhe Rusisë.
