×
Monday, July 15, 2024

Përhapja e koronavirusit, Britania e Madhe: Nuk është koha për masa të forta si Italia

March 13, 2020


Në kohën kur Italia ka marrë masa ekstreme dhe vënde të tjera europiane janë duke shqyrtuar masa për limitimin e lëvizjeve për të mundësuar një reduktim të përhapjes së virusit COVID 19, ekspertët e qeverisë britanike kanë sqaruar se është një iluzion të besosh se mbyllja e gjithçkaje menjëherë çon në raste zero. Madje ekspertët shkojnë më tej duke argumentuar se përhapja e sëmundjes në pjesën më të shëndetshme të popullsisë, në mungesë të vaksinave, mund të shërbejë gjithashtu për të ndihmuar më ‘të dobtit’.

Boris Jonson filloi deklaratën e tij me të vërteta të hidhura duke u shprehur se  “Ne nuk do të kthehemi të përqafohemi me njëri-tjetrin por le të bëhemi gati sepse familjet e tjera do të humbasin të dashurit e tyre “. Me infeksionet zyrtare që janë aktualisht 590, dhe tetë të vdekurit (por vlerësimet e vërteta duket se arrijnë në 10 mijë infeksione) Londra ka zgjedhur të përpiqet të flasë në gjuhën “e arsyes” duke u përpjekur të shpjegojë se nuk jemi duke u përballur me një grip të thjeshtë por me “krizën më të rëndë të shëndetit publik të një brezi të tërë”. Një gjë për të cilën duhet të jemi të vetëdijshëm, ashtu si duhet të jemi të vetëdijshëm në të njëjtën kohë që nuk po ballafaqohemi me Ebola, me vdekshmërinë e saj shumë të lartë.

Në dallim nga vendet si Italia, Franca dhe Shtetet e Bashkuara, ku Giuseppe Conte, Emmanuel Macron dhe Donald Trump i dërguan mesazhet e tyre kombit me një video, Johnson u paraqit para shtypit, pyetjeve të të cilit ai u përgjigj për rreth gjysmë ore dhe ai nuk e bëri atë vetëm. Së bashku me të ishin dy këshilltarët kryesorë shkencorë të qeverisë britanike: shefi i mjekësisë, Chris Whitty dhe këshilltari kryesor shkencor, Patrick Vallance . Dy profesorë me një karrierë të jashtëzakonshme mjekësore dhe akademike. Ata, së bashku me ekipin e tyre, janë autorët e planit për t’iu përgjigjur krizës në vend, që siç e paralajmëruan ata, është vetëm në fazat fillestare, dhe janë pikëeisht ata që janë thirrur të shpjegojnë tezat që do të mbështesin veprimin e qeverisë, veprim i bazuar në “prova shkencore”.

Dëshmi shkencore të cilat ekspertët e qeverisë britanike i komunikuan me transparencë ‘çarmatuese’. Vallance shpjegon njërën nga këto: “Ne nuk mund ta parandalojmë plotësisht përhapjen e infeksionit, dhe nuk është as e dëshirueshme, sepse duhet të krijojmë një imunitet të caktuar në popullatë për të mbrojtur veten edhe në të ardhmen“. Për Covid-19 vaksina mbetet ende larg dhe fakti që pjesa e shëndetshme e popullatës kontrakton virusin dhe zhvillon antitrupa gjithashtu bëhet një mënyrë për të mbrojtur edhe më të prekurit dhe më të moshuarit, të cilët “janë në rrezik më të madh”. Përveç kësaj, ekspertët britanikë besojnë se Covid-19 gjithashtu mund të bëhet si gripi sezonal, dhe në mënyrë ciklike të rishfaqet në të ardhmen dhe më pas midis vaksinave që do të krijohen, dhe imuniteti tashmë i pranishëm në një pjesë të popullatës, do të jetë i lehtë për tu mposhtur.

Rëndësia e kohës

Në Mbretërinë e Bashkuar tani për tani është filluar me karantinën 7-ditore të secilit me simptoma të ngjashme me ato të koronavirusit. Periudhë më e gjatë izolimi apo edhe masa të përgjithësuara janë hipoteza të hapura dhe do të vendosen më vonë nëse është e nevojshme. Sipas ekipit të ekspertëve, masa të tilla duhet të imponohen në kohën e duhur, sepse shëmbëlltyra e një epidemie mbetet e ulët dhe e qëndrueshme për një kohë të caktuar dhe papritmas fillon të rritet dhe të ringrihet. Zgjedhja e momentit të duhur për secilin veprim është thelbësore. Kur u kërkohet të karantinohen ose zbatojnë masa në distancë sociale në kohë krize, “njerëzit ndoshta fillojnë me një entuziazëm të madh, por përfundimisht lodhen. Nëse filloni shumë herët dhe angazhimi i njerëzve dështon kur ne jemi pothuajse në kulmin, domethënë kur ju duhet më së shumti, nuk është mënyra më e mirë për të imponuar masa të caktuara. Ne duhet ta bëjmë atë në momentin e fundit të arsyeshëm, në mënyrë që njerëzit të përqendrohen kur të jetë më e nevojshme, “shpjegoi Whitty, duke paralajmëruar:” Do të jetë një gjë e vështirë për tu bërë, do ta vini re. Dhe për këtë arsye ne nuk mund t’u kërkojmë qytetarëve tanë ta bëjnë atë më shumë sesa konsiderohet e arsyeshme nga epidemiologjia “.

Për momentin vendi ka vendosur të mbështetet mbi të gjitha në sensin qytetar të qytetarëve të saj dhe shkollat, zyrat dhe dyqanet mbesin të hapura normalisht, edhe nëse disa evente janë anuluar tashmë, siç është sfilata e Shën Patrisit në Londër. Sidoqoftë, ata që kanë frikë të kenë virus për ca kohë janë tashmë në izolim, ose izolimi u është imponuar atyre nga kompania.

Megjithatë nëse është një zgjedhje e rrezikshme kjo që po aplikon Londra, ose nëse “provat shkencore” të famshme janë lexuar në mënyrën e duhur, ajo do të zbulohet vetëm në javët e ardhshme.

Eunews.al

0 0 votes
Article Rating


Ndiqe
Me lajmëro për
guest
0 Comments
Inline Feedbacks
View all comments