Tirana po fiton terren si një nga destinacionet evropiane më të përshtatshme për turistët që kërkojnë të udhëtojnë me një buxhet të kufizuar, shkruan media online ruse “Pravda.ru”.
Me shpenzime mesatare ditore prej rreth 59 eurosh për akomodim, ushqim, transport dhe argëtim, kryeqyteti shqiptar ofron mundësinë për të vizituar pikat kryesore turistike pa kaluar kufirin e 100 eurove në ditë për person.
Kostoja relativisht e përballueshme, e kombinuar me ofertën turistike dhe shërbimet e qytetit, po e rendit Tiranën ndër alternativat interesante për një udhëtim ekonomik në Evropë, veçanërisht gjatë sezonit të vjeshtës.
Sipas analizës, turizmi me buxhet të kufizuar po zhvendoset gjithnjë e më shumë drejt Evropës Lindore dhe Turqisë, ku vizitorët mund të gjejnë një raport më të favorshëm mes kostos dhe përvojës së ofruar. Në këtë panoramë, Tirana spikat me një shpenzim mesatar prej vetëm 59 eurosh në ditë.
Kryeqyteti shqiptar, i cili vitet e fundit po tërheq gjithnjë e më shumë turistë të huaj, ofron një ndërthurje të historisë, kulturës, gastronomisë dhe jetës urbane. Ndër pikat më të njohura për vizitorët janë Sheshi Skënderbej, Bulevardi “Dëshmorët e Kombit”, Pazari i Ri dhe Bunk’Art.
Tirana mund të shërbejë gjithashtu si pikënisje për të eksploruar destinacione të tjera të Shqipërisë, nga bregdeti i Adriatikut dhe Jonit deri te zonat malore. Distancat relativisht të shkurtra brenda qytetit dhe mundësitë e transportit e bëjnë atë praktike edhe për turistët që duan të kontrollojnë shpenzimet.
Ekspertët e turizmit këshillojnë që gjatë përgatitjes së buxhetit të një udhëtimi të mos merret në konsideratë vetëm çmimi i hotelit. Maksim Lanin, menaxher i tureve turistike, thekson se duhet të llogariten edhe shpenzimet për transportin, ushqimin dhe aktivitetet gjatë qëndrimit.
Një tjetër mënyrë për të kursyer është zgjedhja e akomodimit jashtë zonave më të frekuentuara turistike. Ekspertja e shërbimeve hoteliere Elena Gumina thotë se qëndrimi pak më larg qendrave kryesore mund të ulë kostot e akomodimit me 20 deri në 30%, ndërsa transporti publik mundëson arritjen e zonave turistike brenda një kohe relativisht të shkurtër.
Për udhëtarët që kërkojnë të shpenzojnë më pak, transporti publik mbetet përgjithësisht alternativë më ekonomike sesa taksitë, ndërsa abonimet ditore ose javore mund të jenë më të leverdishme për ata që kryejnë disa udhëtime gjatë ditës.
Edhe zgjedhja e fluturimeve mund të ndikojë ndjeshëm në koston përfundimtare. Përdorimi i platformave për krahasimin e çmimeve, aktivizimi i njoftimeve për uljet dhe udhëtimet gjatë ditëve të mesjavës mund të ndihmojnë në sigurimin e biletave më të lira.
Për akomodimin, turistët këshillohen të mos mbështeten vetëm te numri i yjeve të hotelit, por të kontrollojnë komentet e vizitorëve të mëparshëm, veçanërisht për gjendjen e dhomave dhe vendndodhjen.
Në aspektin e sigurisë, rekomandohet sigurimi i udhëtimit, rezervimi përmes shërbimeve të besueshme dhe kontrolli paraprak i informacionit për zonën ku do të qëndrojnë.
Me një kosto mesatare ditore dukshëm nën kufirin prej 100 eurosh, Tirana po pozicionohet kështu si një alternativë ekonomike për turistët që duan të vizitojnë një kryeqytet evropian pa shpenzime të larta.
