Vizita e pazakontë e drejtorit të CIA-s, John Ratcliffe, në Moskë këtë javë dyshohet se kishte si një nga qëllimet kryesore paralajmërimin e Rusisë që të mos ndërmarrë një sulm ndaj një vendi anëtar të NATO-s.
Sipas raportimeve të Wall Street Journal dhe CBS, Ratcliffe u përpoq të dekurajonte Moskën nga çdo veprim ushtarak kundër Aleancës, në një kohë kur agjencitë amerikane të inteligjencës vlerësojnë se Rusia mund të jetë duke kërkuar mënyra për të “testuar” unitetin dhe vendosmërinë e NATO-s.
Wall Street Journal raportoi se presidenti rus Vladimir Putin mund të shqyrtojë mundësinë e një “sulmi të kufizuar” ndaj NATO-s gjatë viteve të ardhshme, një skenar që ka shtuar shqetësimet për rrezikun e një përplasjeje të drejtpërdrejtë mes Rusisë dhe Aleancës.
Presidenti amerikan Donald Trump, megjithatë, e minimizoi rëndësinë e udhëtimit të Ratcliffe, duke e cilësuar vizitën si “gjysmë rutinë”.
Në një intervistë me komentatorin konservator Glenn Beck, Trump deklaroi se tema kryesore e diskutimeve ishte lufta në Ukrainë.
“Ne do të donim që lufta në Ukrainë të mbaronte”, tha presidenti amerikan.
Mediat amerikane raportojnë se gjatë qëndrimit në Moskë, Ratcliffe ka diskutuar gjithashtu për luftën në Iran dhe ka paralajmëruar për sanksione të tjera nëse nuk rihapet Ngushtica e Hormuzit.
Trump, nga ana tjetër, mohoi që udhëtimi i drejtorit të CIA-s të kishte lidhje me Iranin apo me shqetësimet për një sulm të mundshëm rus ndaj NATO-s.
“Ai nuk ishte atje për asnjë nga çështjet që përmendët”, deklaroi Trump kur u pyet për raportimet.
Edhe Kremlini ka dhënë pak detaje mbi atë që është diskutuar gjatë vizitës. Zëdhënësi Dmitry Peskov konfirmoi se Ratcliffe kishte mbërritur në Moskë për bisedime “ndërmjet shërbimeve sekrete”, por bëri të qartë se drejtori i CIA-s nuk ishte takuar me Vladimir Putinin.
Sipas Peskov, është ende herët për të vlerësuar ndikimin që këto kontakte mund të kenë në procesin e rivendosjes së marrëdhënieve mes Moskës dhe Uashingtonit.
Ai tha se për momentin nuk janë planifikuar bisedime të tjera, ndërsa kontaktet e zhvilluara deri tani i përshkroi si “pozitive”, pa bërë publike temat konkrete të diskutuara.
Vizita merr rëndësi të veçantë edhe për shkak të historikut të kontakteve të Ratcliffe me Rusinë. Vizita e tij e fundit e njohur në vend ishte në nëntor të vitit 2021, vetëm pak muaj përpara nisjes së pushtimit rus në shkallë të gjerë të Ukrainës në shkurt 2022.
Raportimet kontradiktore mbi qëllimin e udhëtimit kanë lënë të hapura pikëpyetjet mbi mesazhet që Uashingtoni i ka përcjellë Moskës, në një periudhë tensionesh të larta për luftën në Ukrainë dhe sigurinë e vendeve të NATO-s.
