Trump kërkon dorëzimin ose shkatërrimin e uraniumit të pasuruar të Iranit

Presidenti i Shteteve të Bashkuara të Amerikës, Donald Trump, ka deklaruar se rezervat e uraniumit të pasuruar të Iranit duhet të dorëzohen ose të shkatërrohen nën mbikëqyrje ndërkombëtare, në një kohë kur negociatat për një marrëveshje të re mes dy vendeve vijojnë.

Në një postim në platformën Truth Social, Trump theksoi se uraniumi i pasuruar duhet të transferohet në SHBA për shkatërrim ose të asgjësohet në një vend tjetër të pranueshëm, nën mbikëqyrjen e autoriteteve ndërkombëtare përkatëse.

“Uraniumi i pasuruar (‘Pluhuri Bërthamor!’) ose do të dorëzohet menjëherë në Shtetet e Bashkuara për transferim dhe shkatërrim ose, mundësisht, në bashkëpunim dhe koordinim me Republikën Islamike të Iranit, do të shkatërrohet në vend ose në një vend tjetër të pranueshëm, me Komisionin e Energjisë Atomike ose ekuivalentin që mbikëqyr procesin”, shkroi Trump.

Megjithatë, ai nuk sqaroi nëse deklarata i referohej vetëm rreth 440 kilogramëve uranium shumë të pasuruar që zotëron aktualisht Irani apo të gjithë rezervave të tij.

Sipas raporteve amerikane, zyrtarët në Shtetet e Bashkuara të Amerikës kanë argumentuar se një marrëveshje e mundshme duhet të përfshijë heqjen e plotë të rezervave të uraniumit të pasuruar të Iranit.

Nga ana tjetër, Teherani ka bërë të qartë se nuk do të diskutojë programin e tij bërthamor pa një armëpushim të mundshëm 60-ditor, i cili po negociohet si pjesë e përpjekjeve diplomatike për uljen e tensioneve.

Kontaktet mes palëve vazhdojnë, por deri më tani nuk ka sinjale për një marrëveshje përfundimtare, ndërsa zhvillimet mbeten kyçe për stabilitetin në rajon dhe më gjerë.