Gara për postin e Sekretarit të Përgjithshëm të Kombeve të Bashkuara ka hyrë në një fazë të re, ndërsa disa kandidatë kanë shpallur zyrtarisht kandidaturën për të pasuar Antonio Guterres, mandati pesëvjeçar i të cilit përfundon më 31 dhjetor 2026. Sekretari i 10-të i përgjithshëm i OKB-së do të nisë detyrën më 1 janar 2027.
Mes emrave që kanë hyrë në garë është Rafael Grossi, drejtori i përgjithshëm i Agjencisë Ndërkombëtare për Energjinë Atomike (IAEA). Diplomati argjentinas, 65 vjeç, konsiderohet nga shumë diplomatë si favoriti për këtë post, falë përvojës së tij në menaxhimin e krizave ndërkombëtare dhe marrëdhënieve të mira me pesë anëtarët e përhershëm të Këshillit të Sigurimit të OKB-së. Gjatë drejtimit të IAEA-s, ai udhëhoqi përpjekjet për ruajtjen e marrëveshjes bërthamore me Iranin dhe organizoi praninë e ekspertëve të OKB-së në centralin bërthamor të Zaporizhjës në Ukrainë.
Një tjetër kandidate është Rebeca Grynspan nga Kosta Rika, aktualisht në krye të Konferencës së OKB-së për Tregtinë dhe Zhvillimin (UNCTAD). Ish-nënpresidentja e Kosta Rikës e ka pezulluar përkohësisht detyrën për të shmangur konfliktin e interesit gjatë fushatës. Nëse zgjidhet, ajo do të bëhej gruaja e parë në historinë e OKB-së që do të mbante postin e sekretares së përgjithshme.
Në garë është edhe ish-presidentja e Kilit, Michelle Bachelet, e cila ka shërbyer dy herë si presidente e vendit dhe si Komisionere e Lartë e OKB-së për të Drejtat e Njeriut. Kandidatura e saj është dobësuar pasi qeveria kiliane tërhoqi mbështetjen zyrtare dhe ajo është përballur me kritika nga republikanët amerikanë për qëndrimet e saj mbi të drejtat riprodhuese dhe politikat ndaj Kinës.
Ish-presidenti i Senegalit, Macky Sall, gjithashtu synon drejtimin e OKB-së. Ai ka premtuar mbështetje më të madhe për vendet në zhvillim dhe reforma në Këshillin e Sigurimit, për t’u dhënë më shumë përfaqësim shteteve në zhvillim. Kandidatura e tij është paraqitur nga Burundi.
Nga Ekuadori kandidon Maria Fernanda Espinosa, ish-ministre e Punëve të Jashtme dhe ish-presidente e Asamblesë së Përgjithshme të OKB-së. Ajo e ka bazuar platformën e saj në reformimin e organizatës dhe forcimin e rolit të saj në përballimin e sfidave globale, si ndryshimet klimatike dhe biodiversiteti.
Në garë është edhe diplomatja nga Guajana, Carolyn Allison Farida Rodrigues Birkett, aktualisht përfaqësuese e përhershme e vendit të saj në OKB. Nëse zgjidhet, ajo do të ishte gruaja e parë dhe përfaqësuesja e parë e Karaibeve në krye të organizatës. Programi i saj fokusohet në forcimin e parandalimit të konflikteve dhe luftën kundër ndryshimeve klimatike.
Kandidati më i moshuar është Olara Otunnu nga Uganda, ish-nënsekretar i përgjithshëm i OKB-së. Në platformën e tij ai propozon vazhdimin e reformave institucionale, shtimin e përpjekjeve për zgjidhjen e konflikteve ndërkombëtare dhe krijimin e një organi të posaçëm për mbikëqyrjen e inteligjencës artificiale, duke theksuar se lufta kundër ndryshimeve klimatike duhet të ecë paralelisht me zhvillimin ekonomik.
Zgjedhja e sekretarit të ri të përgjithshëm do të kërkojë mbështetjen e Këshillit të Sigurimit të OKB-së dhe më pas miratimin nga Asambleja e Përgjithshme, ndërsa procesi pritet të përfundojë brenda këtij viti.
