Franca dhe Spanja po përballen me një valë të re të nxehti që po favorizon përhapjen e zjarreve masive, duke detyruar autoritetet të evakuojnë mbi 320 mijë banorë dhe të shpallin gjendje të lartë gatishmërie në disa rajone.
Të dy vendet po kalojnë një nga verat më të vështira të viteve të fundit, ndërsa temperaturat pritet të kalojnë 40 gradë Celsius në disa zona, duke krijuar kushte ideale për përhapjen e flakëve.
Në Francën jugperëndimore, situata mbetet kritike në rajonin Gironde, ku zjarret kanë arritur vetëm 15 kilometra larg qytetit të Bordeaux-it. Autoritetet lokale po përgatiten për evakuime të tjera, ndërsa kryebashkiaku i qytetit ka bërë të ditur se janë marrë masa për strehimin e mijëra banorëve në rast se flakët vazhdojnë të avancojnë.
Presidenti francez Emmanuel Macron e ka cilësuar situatën si zjarrin më të rëndë që Franca ka përjetuar që nga Lufta e Dytë Botërore. Sipas autoriteteve, deri tani janë djegur mbi 116 mijë hektarë tokë, ndërsa mijëra zjarrfikës vijojnë betejën me flakët, të cilat përshkruhen si jashtëzakonisht të paparashikueshme.
Edhe Spanja mbetet në gjendje emergjence. Në perëndim të Madridit, zjarret kanë përfshirë më shumë se 27 mijë hektarë, ndërsa autoritetet i konsiderojnë ndër më shkatërruesit në historinë e rajonit. Pamjet satelitore tregojnë se disa vatra të veçanta janë bashkuar në një front të vetëm zjarri, duke vështirësuar ndërhyrjen e forcave zjarrfikëse.
Deri më tani, rreth 220 mijë persona janë evakuuar në Francë dhe mbi 100 mijë në Spanjë. Autoritetet franceze bëjnë të ditur se shumica e zjarreve shkaktohen nga pakujdesia njerëzore, ndërsa për një pjesë të tyre ekzistojnë dyshime se janë vënë qëllimisht.
Ekspertët paralajmërojnë se ndryshimet klimatike po i bëjnë valët e të nxehtit më të shpeshta dhe më intensive, duke rritur ndjeshëm rrezikun e zjarreve pyjore në të gjithë Evropën.
