Italia dhe Gjermania vijojnë diskutimet për kthimin e azilkërkuesve, ndërsa qeveria e Giorgia Melonit kërkon të ulë tonet dhe të shmangë një përplasje të hapur me Berlinin.
Ministri i Brendshëm italian, Matteo Piantedosi, deklaroi se mes dy vendeve nuk ka një “luftë” dhe se mosmarrëveshjet do të zgjidhen përmes dialogut.
“Nuk ka asnjë luftë me Gjermaninë. Do ta rregullojmë çështjen me ekuilibrin që ka karakterizuar gjithmonë marrëdhëniet tona”, tha Piantedosi.
Në qendër të debatit janë të ashtuquajturit “dublinantë”, azilkërkues që largohen nga vendi i parë i hyrjes në Bashkimin Evropian dhe më pas identifikohen në një shtet tjetër. Sipas Piantedosit, Roma dhe Berlini kanë arritur më herët një marrëveshje që i konsideron të mbyllura transferimet që lidhen me periudhën përpara marrëveshjes evropiane të 12 qershorit.
Një tjetër çështje që ka krijuar tension mes dy vendeve janë anijet e organizatave joqeveritare gjermane, të cilat shpëtojnë emigrantë në Mesdhe dhe më pas i zbarkojnë në brigjet italiane.
Edhe ministri i Jashtëm italian, Antonio Tajani, mohoi ekzistencën e një krize serioze me Berlinin, duke deklaruar se pret që palët të gjejnë një ekuilibër për çështjen e emigrantëve.
Megjithatë, sipas raportimeve të mediave italiane, negociatat nuk kanë sjellë ende një zgjidhje konkrete dhe kontaktet mes dy qeverive vazhdojnë.
Ndërkohë, Italia po shqyrton edhe mundësinë e krijimit të qendrave të kthimit të emigrantëve në Afrikë. I pyetur për Kongon dhe Ruandën si vende të mundshme, Piantedosi deklaroi se është ende herët për të dhënë detaje.
Roma po monitoron gjithashtu situatën në Ceuta, mes shqetësimeve për një fluks të ri emigrantësh rreth 15 gushtit.
Italia ka vendosur kontrolle ndaj udhëtarëve nga Spanja, masë që ka shkaktuar kritika nga Madridi. Tajani mbrojti vendimin, duke argumentuar se është marrë për arsye sigurie.
“Ne mbrojmë vetëm interesin e territorit tonë. Kemi thënë se deri më 15 gusht nuk do të hiqet pezullimi i Schengenit, më pas do të shohim se si do të zhvillohet situata”, deklaroi ai.
