Irani ka arritur një marrëveshje me Omanin për rihapjen dhe menaxhimin e përbashkët të Ngushticës së Hormuzit, një prej rrugëve detare më të rëndësishme për tregtinë globale të energjisë. Megjithatë, Teherani ka bërë të qartë se marrëveshja nuk do të zbatohet derisa Shtetet e Bashkuara të përmbushin angazhimet e marra ndaj Iranit.
Zëvendësministri i Jashtëm iranian, Kazem Gharibabadi, deklaroi se zbatimi i marrëveshjes është i lidhur drejtpërdrejt me respektimin nga Uashingtoni të angazhimeve të përfshira në memorandumin e nënshkruar me Teheranin në qershor.
“Megjithatë, marrëveshja nuk do të hyjë automatikisht në fazën e zbatimit, pasi zbatimi i saj është i kushtëzuar nga pala tjetër, veçanërisht Shtetet e Bashkuara, që të përmbushë angazhimet e saj”, deklaroi Gharibabadi.
Sipas zyrtarit iranian, nëse Uashingtoni nuk pranon kushtet e vendosura nga Teherani, Irani nuk do të nxitojë për rihapjen e Ngushticës së Hormuzit dhe do të vazhdojë të mbajë në fuqi masat që i konsideron të nevojshme për mbrojtjen e tij.
“Nëse Shtetet e Bashkuara nuk i pranojnë kushtet e Teheranit, Irani nuk ka nxitim për të rihapur Ngushticën dhe do të mbajë masat e tij mbrojtëse”, tha Gharibabadi.
Marrëveshja mes Iranit dhe Omanit parashikon krijimin e një korridori për kalimin e anijeve përmes Ngushticës së Hormuzit, i cili do të menaxhohet bashkërisht nga të dy vendet.
Zbatimi i saj mbetet kështu i lidhur me zhvillimet mes Teheranit dhe Uashingtonit dhe me përmbushjen e kushteve të vendosura nga pala iraniane.
