Për shkak se njerëzit po tërhiqen vullnetarisht nga jeta shoqërore nga frika e infektimit me COVID-19, nuk po ndodh rimëkëmbja ekonomike globale edhe pse masat e kontrollit, të cilat paralizuan planetin në pranverë, janë hequr, deklaroi sot FMN në një raport.
“Paralizimi i plotë i aktivitetit ekonomik global midis marsit dhe majit padyshim shkaktoi një ndërprerje të ashpër të prodhimit, tregtisë dhe udhëtimeve, ndërsa popullata u izolua në shtëpi për muaj të tërë”, thanë autorët e raportit.
“Megjithatë, një faktor tjetër po nxit recesionin e thellë dhe ai është distancimi vullnetar shoqëror”, vijuan ata.
Sipas FMN-së, kjo është arsyeja pse heqja e kufizimeve reflektohet në një rigjenerim të ngadaltë dhe jo në një rimëkëmbje të konsiderueshme të ekonomisë, siç e kishin parashikuar ekonomistët në fillim të krizës.
Autorët dolën në përfundimin se izolimi dhe distancimi vullnetar shoqëror luajnë një rol pothuajse të krahasueshëm në recesionin ekonomik.
Eunews.al
