Pas hyrjes së rreth 60 mijë emigrantëve në enklavën spanjolle të Ceutës, disa vende të Bashkimit Europian kanë kërkuar shqyrtimin e mundësisë për pezullimin e përkohshëm të Spanjës nga zona Shengen, një masë që mund të zbatohet vetëm në rrethana të jashtëzakonshme.
Fluksi i emigrantëve, i konsideruar si më i madhi i regjistruar ndonjëherë brenda një dite në territorin e BE-së, ka rritur shqetësimet për sigurinë e kufijve të jashtëm të bllokut.
Kryeministrja italiane Giorgia Meloni ishte e para që ngriti këtë mundësi, ndërsa Italia rivendosi kontrollet ajrore dhe detare me Spanjën. Mbështetje për këtë qëndrim kanë shprehur edhe ministrja e Brendshme e Finlandës, Mari Rantanen, si dhe kryeministrja daneze Mette Frederiksen.
Sipas Kodit të Kufijve të Shengenit, pezullimi i pjesëmarrjes së një shteti në zonën e lëvizjes së lirë mund të rekomandohet vetëm si masë e fundit, në rast të mangësive serioze dhe të vazhdueshme në kontrollin e kufijve të jashtëm.
Në një rast të tillë, Komisioni Europian duhet të propozojë masën, e cila më pas duhet të miratohet nga shtetet anëtare të Bashkimit Europian.
Megjithatë, zyrtarë të BE-së theksuan se aktualisht nuk ka asnjë tregues se një procedurë e tillë do të nisë ndaj Spanjës.
Komisioni Europian sqaroi gjithashtu se për Ceutën dhe Melillën zbatohen rregulla të veçanta në kuadër të Shengenit, pasi tashmë ekzistojnë kontrolle kufitare mes këtyre enklavave dhe pjesës tjetër të zonës Shengen.
Ndërkohë, çdo shtet anëtar ka të drejtë të rivendosë përkohësisht kontrolle në kufijtë e tij të brendshëm me Spanjën. Italia e ka bërë tashmë këtë për një periudhë njëmujore, ndërsa Franca vijon të mbajë kontrolle në kufijtë tokësorë për arsye që lidhen me sigurinë dhe emigracionin.
