Federata Argjentinase e Futbollit nuk ka ndërmend të pranojë pa kundërshtim masat disiplinore të vendosura nga FIFA pas incidenteve që shoqëruan përfundimin e finales së Kupës së Botës kundër Spanjës.
Federata ka bërë të ditur se do t’i drejtohet Gjykatës së Arbitrazhit Sportiv (CAS), duke kërkuar rishikimin e dënimeve të rënda të vendosura ndaj Leandro Paredes dhe Nahuel Molinës.
Paredes, i cili sipas vendimit disiplinor ishte i përfshirë në përplasjet pas vërshëllimës së fundit, është pezulluar për 10 ndeshje dhe është gjobitur me rreth 77 mijë euro. Një dënim i rëndë është vendosur edhe ndaj Molinës, i cili është pezulluar për shtatë ndeshje dhe ka marrë të njëjtën gjobë financiare.
Sipas FIFA-s, të dy futbollistët ishin protagonistë në incidentet që shpërthyen pas përfundimit të finales, e cila u karakterizua nga tensione të forta mes lojtarëve të Argjentinës dhe Spanjës.
Masat disiplinore nuk janë kufizuar vetëm te Paredes dhe Molina. Thiago Almada dhe Roberto Ayala, ish-mbrojtësi i njohur i Argjentinës dhe aktualisht pjesë e stafit teknik të kombëtares, janë pezulluar me nga një ndeshje. Secili prej tyre është gjobitur gjithashtu me nga 25 mijë euro.
Edhe vetë Federata Argjentinase e Futbollit është ndëshkuar nga FIFA. Ajo duhet të paguajë një gjobë prej rreth 265 mijë eurosh për shkelje të ndryshme disiplinore të lidhura me finalen.
Megjithatë, shqetësimi kryesor i Argjentinës mbeten pezullimet e gjata të Paredes dhe Molinës, të cilat mund të ndikojnë ndjeshëm në ndeshjet e ardhshme të kombëtares.
Përmes apelimit në CAS, Federata Argjentinase synon të rrëzojë ose të paktën të reduktojë masat e vendosura nga FIFA, në mënyrë që dy futbollistët të rikthehen sa më shpejt në dispozicion të kombëtares.
Çështja tashmë pritet të zhvendoset nga organet disiplinore të FIFA-s në Gjykatën e Arbitrazhit Sportiv, e cila do të shqyrtojë pretendimet e palës argjentinase dhe do të vendosë nëse dënimet do të mbeten në fuqi apo do të ndryshohen.
