Spanja i ka kërkuar Komisionit Europian mbështetjen e Frontex, Europol dhe Agjencisë së Bashkimit Europian për Azilin për të menaxhuar situatën e emigrantëve që vazhdojnë të qëndrojnë në mënyrë të parregullt në Ceuta, pas hyrjes masive nga Maroku.
Sipas mediave spanjolle, ministri i Brendshëm Fernando Grande-Marlaska i ka kërkuar Brukselit që agjencitë europiane të forcojnë strukturën e ngritur për identifikimin, triazhimin dhe përpunimin e dosjeve individuale të emigrantëve që ndodhen ende në qytetin autonom spanjoll.
Madridi ka kërkuar gjithashtu zgjatjen deri më 2 shtator të Operacionit Minerva, një operacion i përbashkët mes policisë spanjolle dhe Frontex. Sipas autoriteteve, operacioni duhet të vazhdojë deri në zgjidhjen e situatës së krijuar në Ceuta.
Një tjetër kërkesë drejtuar Brukselit lidhet me angazhimin e Agjencisë së Bashkimit Europian për Azilin në zhvillimin e intervistave dhe sigurimin e përkthyesve të nevojshëm për procesin e triazhimit. Për shkak të hapësirave të kufizuara në Ceuta, një pjesë e procedurave pritet të kryhet në mënyrë elektronike.
Kërkesa për ndihmë europiane shoqërohet edhe me masa të reja për forcimin e kufirit. Ministria e Brendshme spanjolle njoftoi se do të zbatohet një paketë masash “të jashtëzakonshme”, e cila përfshin zgjerimin e valëpritësve në Tarajal dhe Benzú, vendosjen e një sistemi të përhershëm pengesash detare, mbikëqyrjen ajrore me dronë, përdorimin e anijeve të lehta të ndërhyrjes dhe pajisjeve nënujore të operuara nga distanca.
Ndërkohë, presioni mbi qeverinë qendrore është rritur edhe nga autoritetet lokale. Asambleja e Ceutës i ka kërkuar unanimisht Madridit të ndërhyjë “menjëherë dhe pa vonesa të mëtejshme”, duke paralajmëruar se qyteti ndodhet në një “situatë ekstreme, në prag të kolapsit”.
Bordi i Zëdhënësve, së bashku me deputetët e pavarur, miratoi një deklaratë institucionale përmes së cilës kërkohen masa urgjente, rreth një muaj pas hyrjes masive të të paktën 72 mijë emigrantëve nga Maroku.
“Ceuta ka humbur mënyrën e saj të jetesës dhe qetësinë e saj. Nuk kemi shumë kohë për të shmangur katastrofën”, paralajmëroi presidenti i Ceutës, Juan Vivas.
Deklarata kërkon gjithashtu kthimin në vendet e origjinës, “në përputhje me ligjin”, të personave që morën pjesë në hyrjen masive dhe që vazhdojnë të qëndrojnë në Ceuta.
Autoritetet lokale kanë mbështetur njëkohësisht të drejtën e qytetarëve për të protestuar, për sa kohë demonstratat zhvillohen në mënyrë paqësore dhe të rregullt, ndërsa kanë dënuar incidentet e dhunshme të regjistruara gjatë ditëve të fundit.
“Askush nuk mund ose nuk duhet ta marrë ligjin në duart e veta. Mbrojtja e Ceutës dhe interesave të popullit të saj mund të realizohet vetëm përmes ligjshmërisë”, deklaroi Vivas.
Kërkesa e Madridit për ndërhyrjen e agjencive europiane tregon se presioni i krijuar në Ceuta po konsiderohet tashmë një sfidë që kërkon jo vetëm masa kombëtare, por edhe mbështetje më të gjerë nga Bashkimi Europian.
