Shqipëria në Bienalen e Venecias 2026, Rama: Përfaqësim dinjitoz në skenën ndërkombëtare të artit
Shqipëria po merr pjesë në Bienalen e Venecias 2026 me pavijonin kombëtar “A Place in the Sun”, një projekt artistik i realizuar nga artisti Genti Korini, duke sjellë në vëmendje identitetin kulturor dhe kreativitetin shqiptar në një nga ngjarjet më të rëndësishme të artit bashkëkohor në botë.
Kryeministri Edi Rama ka ndarë pamje nga aktiviteti, duke e cilësuar këtë pjesëmarrje si një moment krenarie për vendin. “Me krenarinë për Shqipërinë në Bienalen e Venecias 2026, ku vendi ynë përfaqësohet me dinjitet edhe në art e kulturë”, u shpreh ai.
Pavijoni shqiptar u prezantua në kuadër të edicionit të 61-të të Bienales, duke ofruar një instalacion artistik multidimensional që bashkon elementë të videos, performancës live, animacionit dhe teatrit të kukullave.
Përmes këtij projekti, Korini eksploron konceptin e identitetit si një proces të hapur dhe në zhvillim, duke reflektuar mbi historinë dhe realitetet bashkëkohore.
Ekspozita do të jetë e hapur për vizitorët nga 9 maji deri më 22 nëntor 2026, duke krijuar një hapësirë për dialog artistik dhe shkëmbim kulturor në nivel ndërkombëtar.
