Rama në Estoni për Konferencën Lennart Meri 2026, fokus te siguria dhe bashkëpunimi transatlantik
Kryeministri Edi Rama ndodhet sot në Tallinn, Estoni, për një vizitë pune në kuadër të pjesëmarrjes në Konferencën Lennart Meri 2026, një nga forumet më të rëndësishme ndërkombëtare për politikën e jashtme, sigurinë dhe sfidat gjeopolitike globale.
Rama do të jetë pjesë e panelit hapës “Një Urë mbi Ujëra të Trazuara: Kapitulli i Ardhshëm i Bashkëpunimit Transatlantik”, ku së bashku me liderë dhe përfaqësues të lartë euroatlantikë do të diskutojë mbi të ardhmen e partneritetit transatlantik, forcimin e rolit të NATO-s dhe sfidat aktuale të sigurisë globale, përfshirë situatën në Ukrainë.
Gjatë vizitës, Kryeministri shqiptar do të zhvillojë një takim dypalësh me homologun e tij estonez, Kristen Michal, në Shtëpinë Stenbock, si dhe do të pritet nga Presidenti i Estonisë, Alar Karis.
Në agjendë përfshihet edhe vizita në Qendrën e Ekselencës për Mbrojtjen Kibernetike të NATO-s, ku delegacioni shqiptar do të njihet me rolin e saj në forcimin e sigurisë kibernetike, si dhe ndalesa në qendra të rëndësishme si e-Estonia Briefing Centre dhe Memoriali i Viktimave të Komunizmit në Maarjamäe.
Po ashtu, Rama pritet të japë një intervistë për median estoneze, ku do të flasë për perspektivën e Shqipërisë në procesin e integrimit në Bashkimin Europian.
