Kryeministri Edi Rama e ka cilësuar si një zhvillim pozitiv bashkimin e forcave politike në Kuvend për miratimin e rezolutës mbi procesin e anëtarësimit të Shqipërisë në Bashkimin Europian.
Gjatë podkastit “FLASIM”, Rama u ndal te konsensusi i arritur mes mazhorancës dhe opozitës, duke e vlerësuar këtë si një moment të rëndësishëm për rrugëtimin europian të vendit. Ai theksoi se, edhe pse i papritur, ky bashkëpunim është një sinjal inkurajues.
Sipas tij, raste të tilla uniteti duhet të përsëriten sa herë që bëhet fjalë për interesa madhore kombëtare, veçanërisht për procesin e integrimit në BE.
“Është një zhvillim i mirëpritur. Do të ishte ideale që kjo frymë bashkëpunimi të ishte e vazhdueshme për çështje të tilla strategjike, por edhe një rast i vetëm mbetet i vlefshëm”, u shpreh Rama.
Kryeministri nënvizoi gjithashtu se procesi i negociatave me Bashkimin Europian po ecën përpara dhe nuk ka pengesa reale, duke paralajmëruar hapa të rinj në hapjen dhe mbylljen e kapitujve.
Ai shtoi se çdo kontribut nga forcat politike në funksion të projektit europian është i mirëpritur, pavarësisht rrethanave apo kohës kur ndodh.
