Ministri i Mbrojtjes, Ermal Nufi, zhvilloi këtë të martë një takim zyrtar në Romë me ministrin italian të Mbrojtjes, Guido Crosetto, ku u diskutua zgjerimi i bashkëpunimit dypalësh në fushën e mbrojtjes, sigurisë dhe industrisë ushtarake.
Gjatë takimit, dy ministrat shqyrtuan mundësitë për thellimin e partneritetit strategjik mes Shqipërisë dhe Italisë, me fokus të veçantë në rritjen e ndërveprueshmërisë së Forcave të Armatosura, zhvillimin e kapaciteteve ushtarake dhe zgjerimin e bashkëpunimit në industrinë e mbrojtjes.
Nufi vlerësoi Italinë si një nga partnerët më të rëndësishëm strategjikë të Shqipërisë dhe një aleat kyç në kuadër të NATO-s, duke theksuar se bashkëpunimi mes dy vendeve ka një rol të rëndësishëm në përballimin e sfidave të përbashkëta të sigurisë.
Sipas Ministrisë së Mbrojtjes, gjatë bisedës u rikonfirmua vizioni i përbashkët i Shqipërisë dhe Italisë për forcimin e sigurisë rajonale dhe evropiane, në një kohë kur mjedisi ndërkombëtar i sigurisë po përballet me sfida të reja.
Në këtë kuadër, dy ministrat riafirmuan angazhimin për ruajtjen e stabilitetit në Ballkanin Perëndimor, duke e konsideruar atë një element kyç për sigurinë e rajonit dhe të gjithë Evropës.
Po ashtu, Shqipëria dhe Italia shprehën mbështetjen e tyre për vazhdimin e misioneve ndërkombëtare në shërbim të paqes dhe sigurisë, si dhe theksuan rëndësinë e forcimit të rolit të NATO-s përballë kërcënimeve të reja dhe sfidave të sigurisë globale.
Takimi në Romë vjen në një periudhë kur Shqipëria po intensifikon bashkëpunimin me partnerët strategjikë në fushën e mbrojtjes, duke synuar modernizimin e kapaciteteve ushtarake dhe zgjerimin e bashkëpunimit në industrinë e mbrojtjes.
