Niko Peleshi viziton Microsoft në Dublin, vlerëson talentin shqiptar në teknologji
Kryetari i Kuvendit, Niko Peleshi, zhvilloi një vizitë zyrtare në qendrën e Microsoft në Dublin, ku u njoh nga afër me zhvillimet më të fundit në ekonominë digjitale dhe inteligjencën artificiale.
Gjatë kësaj vizite, delegacioni shqiptar pati mundësinë të takohej edhe me Alban Xhaferllari, një profesionist shqiptar që punon pranë kësaj kompanie globale.
Niko Peleshi e cilësoi Xhaferllarin si një shembull frymëzues të suksesit shqiptar në arenën ndërkombëtare, duke theksuar se talenti dhe përkushtimi i tij dëshmojnë se shqiptarët po bëhen pjesë aktive e zhvillimeve teknologjike globale.
“Mbresëlënëse vizita në qendrën e gjigantit Microsoft në Dublin. Në zemër të një prej kompanive më të mëdha në botë takuam një shqiptar të talentuar që me punën dhe aftësitë e tij, e nderon emrin e kombit që i përket,” u shpreh ai.
Sipas Peleshit, kontributi i Alban Xhaferllari në fushën e teknologjisë është një dëshmi e qartë se talenti shqiptar nuk njeh kufij, ndërsa theksoi rëndësinë e përfshirjes së shqiptarëve në zhvillimet globale të inteligjencës artificiale dhe ekonomisë digjitale.
Vizita në Microsoft konsiderohet si një hap i rëndësishëm në drejtim të forcimit të bashkëpunimit dhe njohjes së potencialit shqiptar në sektorin e teknologjisë në nivel ndërkombëtar.
