Ndryshimet klimatike kanë rritur ndjeshëm rrezikun e zjarreve shkatërruese në Evropë, duke krijuar kushtet që favorizuan megazjarret e kësaj jave në Francë dhe Spanjë, sipas një analize të publikuar nga grupi shkencor World Weather Attribution.
Zjarret që përfshinë zonat pranë Bordosë dhe Madridit detyruan qindra mijëra banorë të evakuohen dhe shkatërruan qindra banesa, pas një periudhe të gjatë thatësire dhe temperaturash ekstreme.
Sipas studiuesve, ndryshimet klimatike e kanë bërë kombinimin e temperaturave të larta, tokës së tharë dhe erërave të forta të paktën dy herë më të mundshëm në Francë dhe 20 herë më të mundshëm në Spanjë.
Analiza thekson se ngrohja globale kishte rritur më parë edhe gjasat e valës rekord të të nxehtit në Evropën Perëndimore në fund të qershorit, si dhe të thatësirës së pranverës, duke i bërë peizazhet më të rrezikuara nga zjarret.
“Këto megazjarre tregojnë se sa shpejt nxehtësia ekstreme dhe peizazhet e thata të shkaktuara nga klima mund t’i shndërrojnë zjarret në katastrofa kombëtare”, deklaroi kreu i klimës në OKB, Simon Stiell.
Ai shtoi se përdorimi i vazhdueshëm i qymyrit, naftës dhe gazit po e ngroh planetin dhe po i bën këto fenomene më të rrezikshme e më shkatërruese, duke bërë thirrje për përshpejtimin e kalimit drejt energjisë së pastër.
Studimi vlerëson se, në kushtet aktuale klimatike, situata të ngjashme me këtë verë pritet të ndodhin mesatarisht një herë në 20 vjet në jugperëndim të Francës dhe një herë në gjashtë vjet në Spanjën qendrore.
Sipas shkencëtarëve, një faktor kryesor ishte kontrasti mes dimrit të lagësht dhe pranverës së thatë, i cili favorizoi rritjen e bimësisë që më pas u tha, duke krijuar sasi të mëdha materiali të ndezshëm.
“Kjo që po shohim në Francë dhe Spanjë nuk është thjesht fat i keq, por një tregues i qartë i ndikimeve në rritje të ngrohjes së shkaktuar nga aktiviteti njerëzor”, tha studiuesja kryesore e analizës, Clair Barnes nga Imperial College London.
