Presidenti francez Emmanuel Macron ka njoftuar forcimin e mbështetjes ushtarake për Ukrainën, pas sulmeve vdekjeprurëse ruse në një qendër tregtare në Kryvyi Rih, ku humbën jetën 16 persona dhe u plagosën rreth 130 të tjerë.
Macron bëri të ditur se zhvilloi një bisedë telefonike me presidentin ukrainas Volodymyr Zelensky, gjatë së cilës në qendër të diskutimeve ishte nevoja urgjente e Kievit për forcimin e mbrojtjes ajrore.
“E informova Presidentin Zelensky se po rrisim mbështetjen tonë me dërgimin e interceptorëve dhe se po vazhdojmë bashkëpunimin tonë”, deklaroi Macron në një postim në X.
Bisedën e konfirmoi edhe Zelensky, i cili tha se dy liderët kishin rënë dakord për të përshpejtuar furnizimin e Ukrainës me pajisjet më të fundit ushtarake franceze dhe raketa.
“Faleminderit për konfirmimin e gatishmërisë për të ofruar licenca për prodhimin e raketave”, shkroi presidenti ukrainas.
Kjo do t’i hapte rrugën Kievit jo vetëm për të marrë armatime nga Franca, por edhe për të zhvilluar kapacitete prodhuese për raketa përmes licencave franceze.
Macron dhe Zelensky diskutuan gjithashtu për përpjekjet diplomatike që po zhvillohen me partnerët ndërkombëtarë dhe kontaktet me administratën amerikane.
Sipas Zelenskyt, dy presidentët folën për komunikimet me ekipin e presidentit të SHBA-së dhe ranë dakord për hapa që mund të krijojnë “mundësi shtesë diplomatike”.
Biseda vjen në prag të një takimi të rëndësishëm të “Koalicionit të Vullnetit”, që pritet të zhvillohet të hënën në Kiev dhe të fokusohet te vazhdimi i mbështetjes për Ukrainën përballë Rusisë.
Macron, së bashku me drejtuesit e Gjermanisë dhe Mbretërisë së Bashkuar, pritet të bashkëdrejtojë takimin. Presidenti francez do të marrë pjesë në distancë, ndërsa rreth 10 liderë pritet të udhëtojnë drejt Kievit.
Mes pjesëmarrësve që pritet të jenë fizikisht të pranishëm është edhe presidenti i Këshillit Evropian, António Costa.
Takimi zhvillohet në një moment kur Kievi po kërkon nga aleatët përshpejtimin e furnizimeve me sisteme dhe municione të mbrojtjes ajrore, pas valës së fundit të sulmeve ruse ndaj qyteteve dhe infrastrukturës ukrainase.
