Lufta mes Rusisë dhe Ukrainës vijon me intensitet, ndërsa sulmet me dronë dhe kundërsulmet po shkaktojnë viktima dhe dëme në të dyja vendet.
Në të njëjtën kohë, vëmendja është përqendruar edhe te vizita e drejtorit të CIA-s, John Ratcliffe, në Moskë dhe kontaktet e tij me zyrtarë të inteligjencës ruse.
Kremlini konfirmoi se Ratcliffe zhvilloi bisedime me përfaqësues të shërbimeve ruse të inteligjencës, por nuk pati takim me presidentin Vladimir Putin.
“Kontaktet me Putinin nuk ishin planifikuar”, deklaroi zëdhënësi i Kremlinit, Dmitry Peskov.
Sipas tij, presidenti rus është informuar për rezultatet e bisedimeve të zhvilluara me kreun e CIA-s, ndërsa Moska nuk ka dhënë hollësi mbi temat konkrete që janë diskutuar.
Peskov e cilësoi vazhdimin e kontakteve mes shërbimeve të inteligjencës amerikane dhe ruse si një zhvillim pozitiv, duke theksuar se kanale të tilla komunikimi kanë vazhduar të funksionojnë edhe gjatë periudhave më të vështira në marrëdhëniet mes dy vendeve.
Vizita vjen në një moment kur përpjekjet për arritjen e një marrëveshjeje për luftën në Ukrainë mbeten të bllokuara, pavarësisht kontakteve të shtuara mes Uashingtonit dhe Moskës.
Presidenti amerikan Donald Trump e cilësoi vizitën e Ratcliffe si “pothuajse rutinë” dhe hodhi poshtë spekulimet se drejtori i CIA-s kishte udhëtuar drejt Moskës për t’i përcjellë Kremlinit paralajmërime të drejtpërdrejta lidhur me luftën në Ukrainë apo çështje të tjera të sigurisë.
Ndërkohë, në terren luftimet vazhdojnë, ndërsa perspektiva për një armëpushim apo marrëveshje më të gjerë paqeje mes Rusisë dhe Ukrainës mbetet e paqartë.
