Irlanda e Veriut ka hyrë në një krizë të re buxhetore, pasi qeveria e ndarjes së pushtetit nuk arriti të miratojë një buxhet shumëvjeçar brenda afatit ligjor.
Si pasojë, nga e premtja hyn automatikisht në fuqi një kufizim që e ul buxhetin për vitin 2026-2027 me 5% krahasuar me shpenzimet e vitit të kaluar, shumë më pak nga sa autoritetet lokale thonë se nevojitet për të financuar spitalet, shkollat dhe shërbimet publike.
Sekretari i ri britanik për Irlandën e Veriut, Chris Bryant, zhvilloi takimet e para me përfaqësuesit e Sinn Féin dhe Partisë Demokratike Unioniste (DUP), duke theksuar se qeveria britanike pret reforma në administrimin e shërbimeve publike.
“Duhet të arrijmë një marrëveshje për buxhetin. E kuptoj presionin financiar, por nuk kam ardhur me një bllok çeqesh, kam ardhur me një listë reformash që duhen realizuar”, deklaroi Bryant.
Sinn Féin dhe DUP vazhdojnë të fajësojnë njëra-tjetrën për bllokimin politik, ndërsa të dyja kërkojnë më shumë fonde nga qeveria britanike.
Pas takimit me Bryant, ish-ministri i Financave nga Sinn Féin, Conor Murphy, paralajmëroi se institucionet janë në një situatë të brishtë.
“Ekziston rreziku që gjithçka të dalë jashtë kontrollit”, tha Murphy, duke akuzuar DUP-në se nuk ka vullnet politik për ta bërë funksionale qeverisjen e përbashkët.
Nga ana tjetër, lideri i DUP-së, Gavin Robinson, hodhi poshtë kritikat e Sinn Féin, duke ironizuar deklaratat e Murphy. Ai tha se nëse ai shqetësohet se “rrotat po i bien karrocës”, atëherë “duhet të shtrëngojë dadot”.
