Gjermania po përgatitet të investojë afro 12 miliardë euro për krijimin e një arsenali të ri armësh me rreze të gjatë veprimi, që do t’i mundësonte ushtrisë gjermane të godiste objektiva qindra apo edhe mijëra kilometra pas vijës së frontit. Plani konsiderohet një prioritet për Berlinin dhe NATO-n, në një kohë kur vendet evropiane po përshpejtojnë riarmatimin përballë kërcënimit të mundshëm nga Rusia.
Sipas dokumenteve të Ministrisë gjermane të Mbrojtjes të siguruara nga POLITICO, sistemet e reja do të synojnë objektiva strategjikë si qendrat e komandës, bazat ajrore, lëshuesit e raketave dhe qendrat e furnizimit të kundërshtarit.
Dokumentet përcaktojnë si objektiv aftësinë e forcave gjermane për të goditur “thellë në prapavijën e kundërshtarit”, duke ruajtur njëkohësisht mundësinë për t’u përgjigjur me armë konvencionale, pra pa kaluar pragun bërthamor.
Plani përbëhet nga katër pjesë dhe parashikon që sistemet e para të mund të hyjnë në përdorim që në vitin 2027. Armët më të avancuara do të zhvillohen në bashkëpunim me Mbretërinë e Bashkuar dhe pritet të jenë të disponueshme nga mesi i dekadës së ardhshme.
Sipas dokumenteve të brendshme, për realizimin e të gjithë projektit pritet të nevojiten “afro 12 miliardë euro”. Financimi ende nuk është miratuar dhe duhet të kalojë në Bundestag.
Një nga elementët e parë të strategjisë është sigurimi i raketave lundruese me kosto më të ulët, të cilat mund të prodhohen në sasi të mëdha. Berlini synon të nisë përdorimin e tyre që në vitin 2027.
Tre sisteme po shqyrtohen aktualisht: raketa Anthem e kompanisë amerikano-izraelite Covenant Industries, BARS e ofruar nga një kompani ukrainase e paidentifikuar dhe Flamingo e kompanisë ukrainase Fire Point.
Gjermania ndodhet tashmë në negociata kontraktuale me dy prej furnizuesve, me synimin që raketat e para të dorëzohen vitin e ardhshëm për testim dhe kualifikim. Berlini po përgatit gjithashtu kontrata kuadër që do të mundësonin më pas prodhimin në shkallë të gjerë.
Lufta në Ukrainë ka ndikuar drejtpërdrejt në këtë strategji. Sipas vlerësimit gjerman, përdorimi në masë i sistemeve relativisht të lira mund të mbingarkojë mbrojtjen ajrore të kundërshtarit dhe t’u krijojë forcave të armatosura një avantazh të rëndësishëm operacional.
Një tjetër shtyllë e planit është blerja e raketave amerikane Tomahawk. Kancelari Friedrich Merz njoftoi në fillim të korrikut se Berlini kishte arritur një marrëveshje me Uashingtonin për blerjen dhe dislokimin e tyre në Gjermani.
“Po mbyllim një boshllëk të rëndësishëm strategjik në mbrojtjen tonë”, deklaroi Merz, duke theksuar se paralelisht Gjermania do të zhvillojë edhe sisteme evropiane.
Objektivi i Berlinit është që deri në fund të kësaj dekade të ketë një kapacitet fillestar të bazuar te lëshuesit amerikanë Typhon të pajisur me raketa Tomahawk. Kjo do t’i siguronte Gjermanisë një sistem të provuar me rreze të gjatë, ndërkohë që zhvillohen alternativat evropiane.
Dy komponentët e fundit të planit do të realizohen së bashku me Mbretërinë e Bashkuar. Berlini dhe Londra po punojnë për një raketë të re lundruese të avancuar dhe një armë hipersonike, në kuadër të marrëveshjes së bashkëpunimit në fushën e mbrojtjes mes dy vendeve.
Sistemet e reja synohet të kenë aftësi për të goditur objektiva në distanca mbi 2 mijë kilometra, ndërsa kapacitetet e para pritet të jenë gati nga mesi i dekadës së ardhshme.
Pikërisht kjo pjesë përbën edhe zërin më të madh financiar të projektit. Dokumentet parashikojnë afro 9 miliardë euro për zhvillimin dhe blerjen e disa prej sistemeve, si dhe 182 milionë euro për mirëmbajtjen e tyre. Rreth 1.8 miliardë euro të tjera parashikohen për zhvillimin dhe blerjen e raketave lundruese, së bashku me 97 milionë euro për mirëmbajtjen.
Strategjia shënon një ndryshim të rëndësishëm në politikën ushtarake të Berlinit. Në vend që të presë zhvillimin e një sistemi të vetëm evropian, Gjermania synon të krijojë një arsenal të kombinuar: raketa më të lira dhe të prodhueshme në masë për nevoja të menjëhershme, Tomahawk amerikanë për të mbushur boshllëkun në afat të mesëm dhe sisteme shumë më të avancuara evropiane në të ardhmen.
Planet vijnë në një kohë kur drejtuesit ushtarakë gjermanë kanë paralajmëruar se Rusia mund të jetë në gjendje të kërcënojë drejtpërdrejt territorin e NATO-s deri në fund të dekadës. Berlini synon që aftësitë e reja të shërbejnë si element parandalues, duke i bërë të qartë Moskës se infrastruktura ushtarake ruse nuk do të ishte e mbrojtur vetëm për shkak të distancës së saj nga një vijë e mundshme fronti.
