Polonia nuk dëshiron vendosjen e armëve bërthamore të aleatëve në territorin e saj, pavarësisht shqetësimeve në rritje për një kërcënim të mundshëm rus ndaj vendeve të NATO-s.
Qëndrimi u bë i qartë të enjten nga zëvendësministri polak i Mbrojtjes, Paweł Zalewski, gjatë një deklarate për gazetarët në selinë e NATO-s në Bruksel.
“Dua ta them shumë qartë dhe hapur: Polonia nuk dëshiron të ketë koka bërthamore në territorin e saj”, deklaroi Zalewski.
Ai theksoi se Varshava synon të marrë pjesë në sistemin e parandalimit bërthamor të NATO-s, por kjo, sipas tij, nuk nënkupton domosdoshmërisht stacionimin e armëve bërthamore në territorin polak.
Deklarata përbën një nga qëndrimet më kategorike të Varshavës deri më tani për këtë çështje. Polonia kishte shprehur edhe më parë rezerva ndaj mundësisë së stacionimit të armëve bërthamore, por në të njëjtën kohë kishte zhvilluar diskutime paraprake me Shtetet e Bashkuara për një zgjerim të mundshëm të mekanizmit amerikan të parandalimit bërthamor në Evropë.
Varshava i është bashkuar gjithashtu një nisme franceze që synon diskutimin e një roli më të gjerë të kapaciteteve bërthamore të Parisit në mbrojtjen e Evropës.
Megjithatë, brenda udhëheqjes polake nuk mungojnë qëndrime të ndryshme. Presidenti Karol Nawrocki ka lënë të hapur mundësinë që në të ardhmen Polonia të shqyrtojë zhvillimin e kapaciteteve të veta bërthamore.
Debati po zhvillohet në një moment kur shqetësimet për sigurinë në krahun lindor të NATO-s janë shtuar. Zyrtarë perëndimorë kanë paralajmëruar se Rusia mund të jetë në gjendje të kërcënojë territorin e Aleancës deri në fund të kësaj dekade, ndërsa vlerësime të fundit të inteligjencës amerikane sugjerojnë se Moska mund të tentojë edhe më herët të testojë vendosmërinë dhe unitetin e NATO-s.
