Qeveria franceze po përgatit një stërvitje kombëtare për të testuar reagimin e institucioneve ndaj një ndërprerjeje masive të energjisë elektrike, me synimin për të vlerësuar gatishmërinë e vendit përballë krizave të tilla.
Sipas burimeve të njohura me planin, simulimi pritet të zhvillohet në gjysmën e dytë të vitit 2027 dhe do të përfshijë operatorët e rrjetit elektrik Enedis dhe RTE, disa ministri, institucione shtetërore dhe administratën ushtarake franceze.
Qëllimi i ushtrimit është të vlerësojë mënyrën se si Franca do të përballonte një ndërprerje të gjerë të energjisë, të ngjashme me atë që preku Spanjën dhe Portugalinë në prill 2025, ose një sulm të madh kibernetik ndaj rrjetit energjetik.
Sipas burimeve, stërvitja do të testojë kohën e nevojshme për rikthimin e furnizimit me energji dhe aftësinë e autoriteteve për të garantuar funksionimin e shërbimeve thelbësore gjatë krizës.
Plani u konfirmua zyrtarisht gjatë mbledhjes së Komitetit Ndërministror për Rezistencën Kombëtare më 8 korrik, ndërsa një njoftim i detajuar pritet të publikohet deri në fund të këtij viti.
Në kuadër të strategjisë së re të rezistencës kombëtare, autoritetet franceze synojnë gjithashtu të sigurojnë rezerva të mallrave dhe pajisjeve thelbësore, përfshirë gjeneratorë, ilaçe, pajisje telekomunikacioni, pajisje për forcat e rendit, batanije emergjence dhe lëndë të para kritike.
Përgatitja për situata emergjente është kthyer në një prioritet për qeverinë franceze pas valëve ekstreme të të nxehtit dhe zjarreve të mëdha që goditën vendin gjatë verës. Në jugperëndim të Francës, zjarret detyruan evakuimin e mbi 200 mijë personave, ndërsa në Paris autoritetet u detyruan të kërkonin ndihmën e kompanive të mëdha për sigurimin e rezervave të akullit për trajtimin e personave të prekur nga temperaturat e larta.
Kryeministri Sébastien Lecornu ka njoftuar se qeveria do t’i paraqesë Parlamentit një projektligj për forcimin e sistemit të reagimit ndaj emergjencave, me synimin për të përshtatur strukturat shtetërore me sfidat e ardhshme.
