Spanja ka paralajmëruar Italinë se do të ndërmarrë “masa proporcionale” nëse Roma nuk heq kontrollet kufitare të vendosura ndaj udhëtarëve nga Spanja deri më 9 gusht, duke përshkallëzuar përplasjen diplomatike mes dy vendeve pas mbërritjes masive të emigrantëve në enklavën spanjolle të Ceutës.
Italia rivendosi kontrollet kufitare më 1 gusht, duke pezulluar përkohësisht zbatimin e rregullave të zonës Schengen për udhëtarët nga Spanja. Ministri i Jashtëm italian, Antonio Tajani, e justifikoi vendimin si “një zgjedhje të domosdoshme për të mbrojtur sigurinë e qytetarëve tanë dhe kufijtë evropianë”.
Në një deklaratë të ashpër, qeveria spanjolle e cilësoi vendimin e Italisë si të pajustifikuar, diskriminues ndaj qytetarëve spanjollë dhe në kundërshtim me interesat e Bashkimit Evropian.
“Vendimi i qeverisë italiane është i padrejtë, në kundërshtim me interesat e BE-së dhe diskriminues ndaj popullsisë spanjolle”, thuhet në reagimin e Madridit.
Autoritetet spanjolle kritikuan gjithashtu Romën për mënyrën se si po e trajton çështjen e emigracionit, duke theksuar se Italia ka regjistruar vitet e fundit më shumë kalime të parregullta kufitare sesa Spanja, pa u përballur kurrë me masa të ngjashme nga Madridi.
“Edhe pse Italia është shteti anëtar i BE-së që ka regjistruar numrin më të lartë të kalimeve të parregullta në vitet e fundit, me shifra që në disa raste kanë qenë dyfish më të larta se ato të Spanjës, Spanja nuk ka vendosur kurrë kontrolle ndaj udhëtarëve që vijnë nga Italia”, thekson deklarata.
Qeveria spanjolle i ka dhënë Italisë afat deri më 9 gusht për të hequr kontrollet kufitare, në të kundërt paralajmëron masa reciproke për të “mbrojtur interesat dhe dinjitetin e qytetarëve spanjollë”.
“Qeveritë duhet të punojnë për të nxitur mirëkuptimin mes vendeve dhe t’u shërbejnë interesave të përgjithshme të qytetarëve, jo të krijojnë përçarje dhe konflikte të panevojshme të diktuara nga llogaritjet elektorale të brendshme. Besojmë se do të mbizotërojnë fryma evropiane, arsyeja dhe mirëbesimi”, përfundon reagimi i qeverisë spanjolle.
