Presidentja e Komisionit Europian, Ursula von der Leyen, do të zhvillojë të dielën dhe të hënën një vizitë në Groenlandë, në një sinjal të mbështetjes së vazhdueshme të Bashkimit Europian për ishullin, ndërsa Presidenti amerikan Donald Trump ka përsëritur synimin që Shtetet e Bashkuara të marrin kontrollin e tij.
Gjatë qëndrimit në Groenlandë, von der Leyen pritet të nënshkruajë të hënën një deklaratë të përbashkët mes Bashkimit Europian dhe Groenlandës, territor autonom brenda Mbretërisë së Danimarkës.
Vizita zhvillohet në një moment kur rëndësia strategjike e Groenlandës dhe, në përgjithësi, e rajonit të Arktikut është rritur ndjeshëm në axhendën ndërkombëtare.
Që prej rikthimit në Shtëpinë e Bardhë në janar të vitit të kaluar, Trump ka argumentuar se kontrolli i Groenlandës nga SHBA-ja është i nevojshëm për arsye të “sigurisë kombëtare”. Presidenti amerikan ka paralajmëruar se, në të kundërt, ishulli mund të bjerë nën ndikimin ose kontrollin e Kinës apo Rusisë.
Bashkimi Europian ka mbajtur një qëndrim të qartë në mbështetje të Danimarkës dhe popullit të Groenlandës. Në një deklaratë të përbashkët të publikuar në janar, von der Leyen dhe Presidenti i Këshillit Europian, António Costa, theksuan rëndësinë e respektimit të “integritetit dhe sovranitetit territorial”.
Dy drejtuesit e institucioneve europiane deklaruan gjithashtu se BE-ja qëndron “në solidaritet të plotë me Danimarkën dhe popullin e Groenlandës”.
Paralelisht me mbështetjen politike, Brukseli po përgatitet të rrisë ndjeshëm praninë ekonomike në ishull. Von der Leyen ka bërë të ditur se BE-ja synon të shtojë investimet në Groenlandë, duke e lidhur këtë angazhim edhe me forcimin e sigurisë dhe rolit europian në Arktik.
Komisioni Europian ka propozuar 530 milionë euro financim për Groenlandën në kuadër të buxhetit të BE-së për periudhën 2028-2034. Mbështetja lidhet me rëndësinë gjithnjë e më të madhe gjeostrategjike të territorit, i cili ndodhet në një pozicion kyç mes Amerikës së Veriut dhe Europës.
Sipas “Financial Times”, paketa europiane mund të zgjerohet më tej. Gjatë vizitës së saj, von der Leyen pritet të njoftojë një fond shtesë prej 200 milionë eurosh për Groenlandën.
Vizita e Presidentes së Komisionit Europian dhe investimet e paralajmëruara tregojnë përpjekjen e Brukselit për të forcuar marrëdhëniet me Groenlandën dhe praninë e tij në Arktik, në një kohë kur rajoni po merr një rëndësi gjithnjë e më të madhe në konkurrencën strategjike mes SHBA-së, Europës, Rusisë dhe Kinës.
