Rusia ka urdhëruar mbylljen e konsullatës gjermane në Shën Petersburg deri më 18 shtator, si kundërpërgjigje ndaj masave të fundit të Berlinit dhe akuzave se Moska qëndron pas incidentit me dronë në aeroportin Leipzig/Halle.
Ministria e Jashtme ruse njoftoi se konsullata në veriperëndim të vendit duhet të ndërpresë të gjitha aktivitetet dhe i gjithë personeli i saj duhet të largohet nga Rusia deri në afatin e përcaktuar. Ambasada gjermane dhe shërbimet konsullore në Moskë do të vazhdojnë të funksionojnë.
“Kanë qenë autoritetet gjermane ato që provokuan edhe një herë një raund të ri përshkallëzimi në marrëdhëniet dypalëshe. E gjithë përgjegjësia për pasojat bie tërësisht mbi qeverinë e Gjermanisë”, deklaroi Ministria e Jashtme ruse.
Vendimi vjen pasi Berlini akuzoi Rusinë se qëndron pas një tentative sulmi me dronë në territorin gjerman. Incidenti përfshinte tre dronë me material shpërthyes, të cilët u konstatuan në aeroportin Leipzig/Halle ose pranë tij. Një prej tyre u gjet pranë një avioni ukrainas Antonov që përdorej për transportin e municioneve.
Pas incidentit, ministri i Jashtëm gjerman Johann Wadephul njoftoi një seri masash kundër Moskës. Mes tyre është mbyllja më 18 shtator e konsullatës ruse në Bon, si dhe e institucionit kulturor “Russian House” në Berlin.
Moska është kundërpërgjigjur duke njoftuar jo vetëm mbylljen e konsullatës gjermane në Shën Petersburg, por edhe të degëve të qendrës kulturore gjermane Goethe-Institut në Moskë, Shën Petersburg dhe Novosibirsk.
Përplasja diplomatike vjen në një kohë kur disa vende të Bashkimit Europian kanë raportuar një numër në rritje incidentesh të dyshuara si operacione hibride ruse kundër infrastrukturës ushtarake dhe kritike. Moska i ka mohuar vazhdimisht akuzat për përfshirje në incidente të tilla.
Në gusht, dy dronë u konstatuan mbi një objekt të Bundeswehr-it në Gjermani. Ndërkohë, autoritetet polake kanë hetuar zjarrvënien e qëllimshme në një fabrikë dronësh pranë Varshavës si një rast të mundshëm sabotimi të lidhur me aktorë të huaj.
Ministri gjerman i Brendshëm, Alexander Dobrindt, ka paralajmëruar se autoritetet presin tentativa të tjera për sulme hibride kundër vendit.
“Ne supozojmë se Gjermania është objektiv i sulmeve të tjera hibride nga Rusia. Gjithashtu mund të supozohet se ekziston gatishmëria për të shkaktuar dëme edhe më të mëdha përmes sulmeve hibride”, deklaroi ai.
Vendimet reciproke për mbylljen e konsullatave dhe institucioneve kulturore shënojnë një përshkallëzim të ri të tensioneve diplomatike mes Berlinit dhe Moskës.
