Presidenti amerikan Donald Trump po shqyrton mundësinë për të shpallur zyrtarisht fundin e luftës me Iranin, ndërsa paralelisht Pentagoni po zgjeron praninë ushtarake amerikane në Lindjen e Mesme, duke u përgatitur edhe për mundësinë e një konflikti të zgjatur.
Sipas “The Wall Street Journal”, Trump e ka diskutuar privatisht këtë mundësi me këshilltarët e tij të lartë dhe është i prirur drejt shpalljes së përfundimit të luftës.
Presidenti amerikan beson se presioni i fortë ekonomik ndaj Teheranit mund ta detyrojë Iranin të heqë dorë nga programi i tij bërthamor ose ta përballë vendin me një krizë të rëndë të brendshme.
Në këtë kuadër, administrata amerikane po vazhdon të intensifikojë presionin ekonomik. Javën e kaluar, SHBA nisi operacionin “Pariah Ekonomik”, i cili synon sektorë kyç të ekonomisë iraniane, përfshirë industrinë e naftës, transportin detar, aviacionin, arin, teknologjinë dhe ekonominë digjitale.
Megjithatë, ndërsa në Shtëpinë e Bardhë po diskutohet mundësia për t’i dhënë fund zyrtarisht konfliktit, përgatitjet e Pentagonit tregojnë se Uashingtoni nuk po përjashton një skenar shumë më të gjatë.
Sipas raportimit, ushtria amerikane po zgjeron dislokimet në Lindjen e Mesme, duke sinjalizuar se është duke u përgatitur për mundësinë që tensionet me Iranin të vazhdojnë edhe gjatë vitit të ardhshëm.
Aktualisht, SHBA ka rreth 50 mijë trupa dhe 19 anije luftarake të dislokuara në rajon. Mes tyre ndodhen dy aeroplanmbajtëse dhe 13 shkatërrues të pajisur me raketa të drejtuara.
Kjo prani e konsiderueshme ushtarake synon t’i japë Trump më shumë mundësi për të reaguar ndaj zhvillimeve në terren dhe për të ndryshuar strategjinë në varësi të veprimeve të Teheranit.
Kështu, administrata amerikane po ndjek një strategji në dy drejtime: nga njëra anë po shqyrton shpalljen e përfundimit të luftës dhe po rrit presionin ekonomik ndaj Iranit, ndërsa nga ana tjetër po mban dhe përforcon kapacitetet ushtarake në rajon për t’u përballur me një konflikt që mund të zgjasë.
