Kryeministri Edi Rama deklaroi se debati ndërkombëtar rreth investimit të planifikuar në Zvërnec është ndikuar kryesisht nga lidhja e investitorëve me familjen e presidentit amerikan Donald Trump, ndërsa theksoi se për qeverinë shqiptare rëndësi kanë faktet dhe cilësia e projektit.

Gjatë një konference me gazetarë të Bashkimit Europian, Rama u ndal te investimi i lidhur me Jared Kushner, duke theksuar se çdo projekt do të vlerësohet mbi bazën e standardeve dhe rezultateve konkrete, pavarësisht emrave të përfshirë.

“Arsyeja pse bota është kaq e entuziazmuar për këtë është për shkak të Trumpit, sepse nuk besoj se flamingot në Shqipëri do të kishin bërë një trazim kaq të madh. Por kjo nuk ka të bëjë me Trumpin. Kur Jared Kushner dhe Ivanka erdhën këtu, nuk ishte e qartë nëse Trump do të shkonte në burg apo në Shtëpinë e Bardhë”, u shpreh Rama.

Kryeministri theksoi se ai i ka konsideruar Kushner dhe Ivanka Trump si investitorë të interesuar për të investuar në Shqipëri dhe jo si përfaqësues të një familjeje politike.

“Për mua, ata nuk ishin familja e Trumpit, por investitorë që donin të ndërtonin në Shqipëri. Mua më thonë se jam njeriu i Sorosit, tani më thonë se jam njeriu i Kushnerit. Gjeni vetë se kush jam!”, tha ai.

Rama shtoi se vendimmarrja për investimin do të mbështetet tek projekti dhe rezultatet që ai ofron.

“Unë jam kryeministri i vendit dhe dua që çdo projekt të bazohet në fakte. Përgjigjja do të jepet përmes vetë projektit: nëse projekti do të japë përgjigjen e duhur, do të vazhdojë; nëse jo, do të duhet të ndryshohet”, deklaroi kryeministri.