Kryeministri hungarez Péter Magyar ka kritikuar mungesën e lidershipit politik në Bashkimin Europian, duke kërkuar që Brukseli të marrë vendime më të guximshme dhe të zhvendosë fokusin nga burokracia dhe menaxhimi i krizave drejt konkurrueshmërisë ekonomike dhe forcimit të rolit global të Europës.
Magyar i bëri deklaratat gjatë Forumit Strategjik të Bledit, ku mori pjesë në një panel së bashku me kryeministrin slloven Janez Janša, atë kroat Andrej Plenkoviq dhe kryeministrin çek Andrej Babish. Në qendër të diskutimit ishin bashkëpunimi rajonal dhe aftësia e Europës për të konkurruar me fuqitë e tjera globale.
“Ka mungesë të lidershipit politik, për të qenë të sinqertë, në Bashkimin Europian”, deklaroi Magyar, duke kritikuar atë që e cilësoi si burokraci të tepruar brenda institucioneve europiane.
Sipas tij, BE duhet të rikthejë vëmendjen te problemet konkrete me të cilat përballet kontinenti, veçanërisht në ekonomi. Magyar solli si shembull konkurrencën me Kinën, duke argumentuar se ndërsa Europa merret me procedura dhe çështje institucionale, Pekini po përgatitet të investojë në projekte strategjike europiane, përfshirë centrale bërthamore dhe fabrika automobilistike.
“Ekziston tashmë një ndjenjë edhe në Bruksel se duhet të ndryshojmë. Sipas mendimit tim, duhet të vendosim nëse Bashkimi Europian dëshiron vetëm të mbijetojë apo të fitojë”, u shpreh kryeministri hungarez.
Magyar kritikoi gjithashtu mënyrën se si Brukseli ka trajtuar Hungarinë në lidhje me politikat e migracionit dhe gjobat e vendosura ndaj Budapestit për moszbatimin e një vendimi të Gjykatës së Drejtësisë së BE-së.
Në vitin 2024, gjykata vendosi ndaj Hungarisë një gjobë prej 200 milionë eurosh, së bashku me një penalitet prej 1 milion eurosh për çdo ditë vonesë, për shkak të moszbatimit të një vendimi të mëparshëm që lidhej me rregullat e azilit.
“Është mjaft e vështirë t’u shpjegosh hungarezëve pse Hungaria trajtohet kaq padrejtësisht në Bruksel për këto çështje”, deklaroi Magyar.
Ai argumentoi se Hungaria po paguan miliona euro për një politikë kufitare që, sipas tij, synon njëkohësisht mbrojtjen e kufijve të përbashkët europianë.
Gjatë qeverisjes së Viktor Orbán, Hungaria ndërtoi një gardh përgjatë kufirit me Serbinë për të frenuar hyrjen e emigrantëve dhe kufizoi ndjeshëm procedurat e azilit. Politikat u kundërshtuan nga institucionet europiane dhe çuan në një përplasje të gjatë ligjore mes Budapestit dhe Brukselit.
Magyar, i cili gjatë fushatës elektorale premtoi riorientimin e marrëdhënieve të Hungarisë me partnerët perëndimorë në BE dhe NATO, i përket Partisë Popullore Europiane, familjes politike të qendrës së djathtë ku bën pjesë edhe Presidentja e Komisionit Europian, Ursula von der Leyen.
Pas ndryshimit të qeverisë, Budapesti arriti një marrëveshje me Komisionin Europian për zhbllokimin e 16.4 miliardë eurove në fonde që ishin ngrirë më parë.
Qeveria hungareze deklaroi gjithashtu se kishte përmbushur kushtet e lidhura me fondin e rimëkëmbjes prej 10 miliardë eurosh, përmes ndryshimeve në legjislacionin kundër korrupsionit dhe sistemin e drejtësisë.
Megjithatë, deklaratat e Magyar në Bled tregojnë se tensionet mes Budapestit dhe Brukselit nuk janë zhdukur plotësisht. Kryeministri hungarez po kërkon një BE më pak të përqendruar te burokracia dhe më të aftë për të konkurruar ekonomikisht dhe gjeopolitikisht, duke e paraqitur këtë si një zgjedhje mes thjesht mbijetesës së Unionit dhe forcimit të tij si fuqi globale.
