Refuzimi i kryeministrit izraelit Benjamin Netanyahu ndaj planit 15-pikësh të mbështetur nga Uashingtoni për Gazën ka ngritur shqetësime mes aleatëve të Shteteve të Bashkuara për aftësinë e presidentit Donald Trump për të ndikuar mbi Izraelin dhe zhvillimet në Lindjen e Mesme.
Sipas POLITICO, diplomatë dhe zyrtarë të njohur me strategjinë amerikane në rajon vlerësojnë se po krijohet përshtypja se SHBA ose nuk e ka ndikimin e nevojshëm mbi qeverinë izraelite, ose nuk është e gatshme ta përdorë atë.
Netanyahu kundërshtoi planin e Shtëpisë së Bardhë, duke këmbëngulur se Hamasi duhet të jetë “çarmatosur realisht” përpara se Izraeli të tërheqë trupat nga Gaza.
Qëndrimi i tij ka ngritur pikëpyetje edhe mbi të ardhmen e “Board of Peace”, nismës me 27 vende të krijuar si pjesë e përpjekjeve të Trump për t’i dhënë fund konfliktit mes Izraelit dhe Hamasit.
Një diplomat arab tha se refuzimi i planit ka pasoja të rëndësishme për stabilitetin afatgjatë të rajonit dhe sigurinë e Izraelit, duke argumentuar se Trump mbetet personi me potencialin më të madh për të ushtruar presion ndaj Netanyahut.
Megjithatë, presidenti amerikan ka shmangur deri tani një përplasje publike me kryeministrin izraelit. Trump deklaroi të hënën se vazhdon të ketë një “marrëdhënie të mirë” me Netanyahun, pavarësisht kundërshtimit të propozimit amerikan.
Një zyrtar i administratës Trump tha se Shtëpia e Bardhë nuk e konsideron qëndrimin e Netanyahut si fundin e procesit të paqes. Sipas tij, deklaratat e kryeministrit izraelit shihen kryesisht si pozicionim politik për publikun vendas përpara zgjedhjeve parlamentare të tetorit.
Ndërkohë, zyrtarë të “Board of Peace” pretendojnë se puna për zbatimin e planit vazhdon dhe se diskutimet me Izraelin janë ende në zhvillim. Po përgatitet gjithashtu infrastruktura logjistike për një forcë ndërkombëtare stabilizimi që parashikohet të dislokohet në Gaza.
Në Evropë, disa zyrtarë vazhdojnë të shpresojnë se nisma amerikane mund të rikthejë procesin e paqes në rrugën e duhur. Të tjerë paralajmërojnë se vështirësitë për të bindur Netanyahun po dëmtojnë besueshmërinë e Uashingtonit në rajon.
Një diplomat evropian i cituar nga POLITICO tha se Trump po humbet besueshmërinë, ndërsa situata në Lindjen e Mesme vazhdon të karakterizohet nga pasiguri e lartë.
Përplasja për Gazën vjen në një moment kur administrata amerikane po përballet edhe me sfida të tjera në rajon, përfshirë luftën me Iranin dhe përpjekjet për t’i dhënë fund konfliktit mes Izraelit dhe Hezbollahut në Liban.
