Koronavirusi/Eurodeputetët, Ballkani Perëndimor duhet të përfshihet në skemën e autorizimit të eksportit të BE-së
BRUKSEL – Anëtarët e grupeve të ndryshme në Parlamentin Evropian i kanë dërguar një letër të përbashkët Presidentes së Komisionit Evropian, Ursula von der Leyen, duke kërkuar që vendet e Ballkanit Perëndimor të përfshihen në skemën e kufizimeve të eksportit të pajisjeve mjekësore dhe prokurimit të përbashkët të mallrave që kanë të bëjnë me krizën.
Kanë qenë anëtarët e Partisë Popullore Evropiane (PPE), të Gjelbërit dhe Liberalët në Parlamentin Evropian të cilët i kanë dërguar një letër Presidentes së Komisionit Evropian ku thuhej se koordinimi evropian i pandemisë COVID-19 duhet të përfshijë gjithashtu edhe vendet e Ballkanit Perëndimor.
Ata paralajmëruan se kufizimet e vendosura të eksporteve në pajisjet mjekësore mund të sjellin pasoja serioze për rajonin.
“Sistemet shëndetësore në këto vende janë përgjithësisht më të dobëta, për këtë arsye vendet e Ballkanit Perëndimor kanë nevojë për mbrojtje të forcuar nga pala e BE-së. Prandaj, ne ju bëjmë thirrje që të përfshini të gjashtë vendet e Ballkanit Perëndimor në skemën e autorizimit të eksportit BE + që aktualisht mbulon vendet anëtare të BE-së, si dhe Islandën, Lihtenshtajnin, Norvegjinë, Zvicrën dhe Mbretërinë e Bashkuar “, kanë shkruar eurodeputetët.
Sipas tyre, vendet e Ballkanit Perëndimor gjithashtu duhet të jenë në gjendje të marrin pjesë në prokurimin e përbashkët të mallrave që kanë të bëjnë me krizën.
“Njerëzit e Ballkanit Perëndimor ndjehen dhe jetojnë si evropianë. BE ka vënë vazhdimisht procesin e zgjerimit në pritje. Sidoqoftë, këto vende na kanë mbështetur për vite me radhë për migracionin dhe fushat e tjera. Tani është radha jonë të tregojmë solidaritet ”, shkruhet ndër të tjera në letër.
Eurodeputetët Lukas Mandl (PPE), Viola von Cramon-Taubadel (të Gjelbërtit), Raportues për Kosovën, Ilhan Kyuchyuk (“Rinovoni Evropën”), raportues për Maqedoninë e Veriut dhe Andrey Kovatchev (PPE) e mbyllën letrën drejtuar Ursula von der Leyen, duke theksuar se pandemia prek të gjithë dhe se solidariteti i të gjitha vendeve evropiane mund të shpëtojë jetë.
Eunews.al
