Finlanda ka përuruar të hënën një gardh prej rreth 200 kilometrash përgjatë kufirit të saj me Rusinë, në një kohë kur marrëdhëniet mes dy vendeve mbeten të tensionuara dhe Helsinki po forcon masat e sigurisë kufitare.
Kufiri mes Finlandës dhe Rusisë është i mbyllur që prej dhjetorit të vitit 2023, pas mbërritjes së më shumë se 1,300 emigrantëve pa vizat e nevojshme.
“Sot, situata është e qetë, por e tensionuar dhe nuk e dimë vërtet se çfarë na pret nesër. Megjithatë, gjërat mund të ndryshojnë shumë shpejt, kështu që duhet të jemi plotësisht të përgatitur”, deklaroi ministrja finlandeze e Brendshme, Marie Rantanen.
Në vitin 2023, Finlanda akuzoi Rusinë se po zhvillonte një formë “lufte hibride”, duke pretenduar se Moska po orkestronte mbërritjen e shtetasve të vendeve të treta në kufirin finlandez. Kremlini i ka mohuar këto akuza.
Tensionet në kufi u shfaqën disa muaj pasi Finlanda i dha fund politikës së saj shumëvjeçare të neutralitetit ushtarak dhe iu bashkua NATO-s.
Sipas ministres së Brendshme, gardhi është pjesë e një sistemi më të gjerë për forcimin e sigurisë dhe mbikëqyrjes së kufirit.
“Kjo është pjesë e sistemit tonë të sigurisë kufitare dhe na ndihmon me mbikëqyrjen, por gjithashtu na lejon, nëse është e nevojshme, të parandalojmë njerëzit të hyjnë në territorin finlandez”, tha Rantanen.
Gardhi nuk shtrihet përgjatë gjithë kufirit mes Finlandës dhe Rusisë, por është ndërtuar në zona të përzgjedhura që konsiderohen veçanërisht të rëndësishme për kontrollin dhe sigurinë.
Sipas të dhënave të publikuara nga media finlandeze Yle dhe të cituara në rrjetet sociale, projekti është realizuar gjatë një periudhe prej rreth katër vitesh dhe ka kushtuar rreth 356 milionë euro.
Finlanda nuk është i vetmi vend europian që ka ngritur barriera fizike në kufijtë lindorë. Gardhe të ngjashme janë ndërtuar në Letoni, Lituani dhe Poloni përgjatë kufijve me Bjellorusinë, si dhe në Estoni përgjatë kufirit të saj me Rusinë.
Masat synojnë të kufizojnë kalimet e parregullta të emigrantëve dhe të forcojnë kontrollin kufitar, ndërsa vendet në kufirin lindor të NATO-s dhe Bashkimit Europian vijojnë të rrisin masat e sigurisë përballë tensioneve me Rusinë.
