Komentet e ish-kryeministrit spanjoll Mariano Rajoy për kombëtaren e Francës kanë shkaktuar reagime të forta në Francë dhe Spanjë, vetëm pak ditë përpara përballjes mes dy skuadrave në gjysmëfinalen e Botërorit.

Në një artikull të botuar në gazetën spanjolle El Debate, Rajoy e cilësoi Francën si “një skuadër të nivelit shumë të lartë, sigurisht pa francezë”, duke iu referuar origjinës afrikane të disa prej futbollistëve të saj.

Deklarata u dënua menjëherë nga përfaqësues të majtë në të dy vendet. Kreu i Partisë Komuniste Franceze, Fabien Roussel, e akuzoi Rajoyn për racizëm, duke shkruar në rrjetin X se “ata nuk mund të ndalojnë së shfaquri racizmin e hapur për të provokuar kombëtaren tonë të mrekullueshme”.

Edhe Pierre-Alexandre Anglade, deputet francez dhe kryetar i Komisionit për Çështjet Evropiane në Asamblenë Kombëtare, i cilësoi komentet si “një fyerje të rëndë ndaj kombëtares franceze dhe vetë Francës”.

Në Spanjë reagoi edhe Partia Socialiste e kryeministrit Pedro Sánchez (PSOE), e cila deklaroi se është “e turpshme që një ish-kryeministër i Spanjës bën deklarata të tilla”.

Në të njëjtin artikull, Rajoy ironizoi edhe të majtën spanjolle, duke shkruar se nuk i pëlqejnë “as Djajtë dhe as të kuqtë”, në një referencë ndaj kombëtares belge, e njohur si “Djajtë e Kuq”.

Mariano Rajoy, përfaqësues i Partisë Popullore, drejtoi qeverinë spanjolle nga dhjetori 2011 deri në maj 2018.

Debati vjen vetëm një javë pasi zëvendësguvernatorja e provincës Mendoza në Argjentinë, Hebe Casado, e quajti kombëtaren franceze “një skuadër afrikane pa edukatë”, pas fitores së Francës ndaj Paraguait. Deklaratat e saj çuan në ndalimin e hyrjes në Ambasadën Franceze në Argjentinë.

Po ashtu, senatorja paraguajane Celeste Amarilla sulmoi në rrjetet sociale sulmuesin francez Kylian Mbappé, duke e quajtur “kamerunas të kolonizuar që shtiret si francez”. Deklaratat e saj u dënuan gjerësisht në Francë, ndërsa vetë Mbappé iu përgjigj duke e cilësuar senatoren “të padenjë për postin që mban”.