Irani u ka pranuar privatisht zyrtarëve amerikanë se sulmet ndaj anijeve tregtare në Ngushticën e Hormuzit, të cilat çuan në përshkallëzimin e fundit ushtarak mes Uashingtonit dhe Teheranit, janë kryer nga “një grup ekstremistësh jashtë kontrollit”. Kështu raportoi CBS News, duke cituar disa zyrtarë amerikanë.

Sipas raportit, drejtues iranianë i kanë thënë këshilltarëve të presidentit Donald Trump se sulmet nuk përfaqësonin qëndrimin e qeverisë iraniane dhe se kishin qenë një përpjekje për të sabotuar negociatat e paqes dhe armëpushimin.

“(Iranianët) janë kthyer në tryezën e bisedimeve dhe kanë thënë: ‘Kemi gabuar. Kemi bërë një gabim. Le të vazhdojmë të bisedojmë’”, citojnë zyrtarët amerikanë.

CBS News thekson se ky pranim është bërë në bisedime private dhe nuk përbën një deklaratë zyrtare të autoriteteve iraniane.

“Nëse kjo nuk është pozicioni zyrtar i Teheranit, atëherë për ta nuk do të jetë një ditë e mirë”, tha një zyrtar amerikan për rrjetin televiziv.

Një tjetër zyrtar u shpreh se administrata amerikane ndodhet aktualisht në një fazë “pritjeje dhe vëzhgimi”, ndërsa vlerëson hapat e ardhshëm të Iranit.

Megjithatë, edhe pse pala iraniane pretendon se sulmet ndaj anijeve janë organizuar nga një element i devijuar brenda sistemit, me qëllim sabotimin e marrëveshjes së administratës Trump, zyrtarët amerikanë të cituar nga CBS News besojnë se motivet e sulmeve mund të kenë qenë të tjera dhe vijojnë të analizojnë informacionet e inteligjencës për incidentin.