Politikani britanik Andy Burnham, i cili pritet të marrë detyrën e kryeministrit të Mbretërisë së Bashkuar javën e ardhshme, premtoi se do t’i japë fund asaj që e quajti “kultura e fshehjes” në institucionet publike dhe do të rikthejë përgjegjshmërinë në administratën shtetërore.
Në fjalimin e tij të parë në Dhomën e Komunëve pas rikthimit në Parlament muajin e kaluar, Burnham vlerësoi projektligjin për Përgjegjshmërinë e Zyrave Publike, i njohur gjerësisht si Ligji Hillsborough, duke e cilësuar atë një reformë historike.
Sipas tij, ligji do të ndryshojë mënyrën se si funksionon drejtësia në Britani.
“Ky ligj do të ndryshojë mënyrën se si ky vend mendon dhe vepron për drejtësinë. Ai rishkruan mënyrën e funksionimit të shtetit dhe ua rikthen pushtetin qytetarëve të zakonshëm”, deklaroi Burnham.
Projektligji u miratua të martën në Dhomën e Komunëve dhe tani do t’i kalojë Dhomës së Lordëve për shqyrtim të mëtejshëm.
Ligji mban emrin e tragjedisë së Hillsborough, ku në vitin 1989 humbën jetën 97 tifozë të Liverpoolit gjatë një ndeshjeje futbolli. Për dekada me radhë, familjet e viktimave kërkuan zbardhjen e së vërtetës, ndërsa hetimet zbuluan se policia kishte fshehur prova dhe kishte përhapur versione të rreme mbi ngjarjen.
Burnham, i lindur në Liverpool, tha se ndihej krenar që ky ligj mishëron vlerat e qytetit të tij dhe do të ndihmojë edhe viktimat e padrejtësive të tjera, duke përmendur tragjedinë e Grenfell Tower, veteranët e testeve bërthamore dhe ish-punonjësit e postës që u akuzuan padrejtësisht për vjedhje.
“Fushata për të vërtetën dhe drejtësinë nuk përfundon këtu. Përkundrazi, ajo përshpejtohet nga ky moment”, u shpreh ai.
Burnham vlerësoi gjithashtu ish-kryeministrin Keir Starmer, duke e cilësuar miratimin e Ligjit Hillsborough si një nga trashëgimitë më të rëndësishme të qeverisë së tij.
Nga ana e tij, Starmer deklaroi në Parlament se mënyra si institucionet shtetërore trajtuan tragjedinë e Hillsborough përbën “një njollë në historinë e Britanisë”, duke akuzuar shtetin se kishte përdorur fuqinë e tij për të penguar zbardhjen e së vërtetës dhe vendosjen e drejtësisë.
