Presidenti Bajram Begaj ka përgëzuar peshëngritësin shqiptar Briken Calja për suksesin e arritur në Lojërat Mesdhetare “Taranto 2026”, ku fitoi medaljen e artë.
Calja shkëlqeu në kategorinë deri në 75 kilogramë, duke siguruar vendin e parë dhe duke vendosur njëkohësisht katër rekorde të reja mesdhetare.
Kreu i Shtetit e cilësoi rezultatin e peshëngritësit shqiptar një arritje të rëndësishme që bën krenar të gjithë vendin.
“Urime peshëngritësit tonë, Briken Calja, për medaljen e artë në Lojërat Mesdhetare Taranto 2026! Një rekord i ri që na bën krenarë. Urime, Briken! Shqipëria krenohet me ty!”, shkroi Presidenti Begaj.
Suksesi në Taranto i shtohet rezultateve të rëndësishme të Caljas në arenën ndërkombëtare, ndërsa katër rekordet mesdhetare e bëjnë edhe më të spikatur paraqitjen e tij në këtë kompeticion.
