Administrata e presidentit Donald Trump i ka dhënë miratimin paraprak kompanisë World Liberty Trust Co., e lidhur me familjen Trump, për të operuar si bankë federale e tipit trust, një vendim që ka shkaktuar reagime të forta nga demokratët dhe organizatat për etikën në SHBA.
Zyra e Kontrollorit të Monedhës (OCC), autoriteti rregullator bankar pranë Departamentit amerikan të Thesarit, njoftoi të premten se ka miratuar me kushte aplikimin e kompanisë për një licencë federale. Megjithatë, World Liberty Trust duhet të përmbushë kërkesa shtesë përpara se të marrë miratimin përfundimtar.
Vendimi i jep kompanisë një status të ri federal dhe mundëson mbikëqyrjen e saj nga autoritetet bankare amerikane, ndërsa presidenti Trump dhe familja e tij vazhdojnë të kenë interesa të konsiderueshme financiare në këtë sipërmarrje.
Presidenti i World Liberty Trust Co., Zach Witkoff, djali i të dërguarit special të Trumpit, Steve Witkoff, tha se licenca do t’i mundësojë kompanisë të administrojë monedhën e saj dixhitale USD1, një stablecoin i lidhur me vlerën e dollarit amerikan.
“USD1 është rritur sepse institucionet kanë besim te mënyra se si funksionon dhe besimi në këtë shkallë kërkon mbështetjen e mbikëqyrjes federale,” deklaroi Witkoff.
Miratimi ka ngjallur kritika të forta nga demokratët, të cilët e konsiderojnë vendimin një konflikt të qartë interesi, pasi lidhet drejtpërdrejt me interesat financiare të presidentit në detyrë.
Senatorja Elizabeth Warren, anëtarja më e lartë demokrate në Komisionin Bankar të Senatit, e cilësoi vendimin si “aktin më flagrant të vetëpërfitimit që sistemi financiar amerikan ka parë ndonjëherë”.
Demokratët prezantuan gjithashtu një projektligj që synon të ndalojë autoritetet rregullatore të miratojnë banka në pronësi ose nën kontrollin e presidentit, familjarëve të tij, zëvendëspresidentit, anëtarëve të Kongresit dhe zyrtarëve të tjerë të lartë federalë.
Edhe organizata Citizens for Responsibility and Ethics in Washington e kritikoi vendimin, duke e cilësuar atë si shembullin më të rëndë deri më tani të përfitimit të biznesit privat të presidentit nga posti publik.
Nga ana tjetër, World Liberty ka mohuar ekzistencën e konfliktit të interesit, duke deklaruar se Donald Trump nuk është i përfshirë në drejtimin e kompanisë dhe se asnjë prej drejtuesve të saj nuk mban funksione në administratën federale.
Megjithatë, sipas të dhënave të publikuara nga kompania, një entitet i lidhur me Trumpin dhe anëtarët e familjes së tij zotëron rreth 38% të kompanisë kontrolluese të World Liberty Financial, si edhe 22.5 miliardë tokenë qeverisës të platformës.
Sipas deklarimeve financiare, Trump ka raportuar rreth 600 milionë dollarë të ardhura nga shitja e tokenëve dhe aksioneve të World Liberty gjatë vitit 2025, pjesë e fitimeve totale prej rreth 1.4 miliardë dollarësh nga investimet në sektorin e kriptomonedhave.
Licenca nuk i lejon kompanisë të funksionojë si një bankë tradicionale që ofron kredi ose pranon depozita të siguruara federalisht. Ajo do të operojë si bankë trust kombëtare me funksione të kufizuara.
Megjithatë, statusi i ri i jep World Liberty të drejtën të emetojë dhe të shlyejë drejtpërdrejt stablecoin-in USD1, të administrojë rezervat që mbështesin këtë monedhë dhe të ofrojë shërbime ruajtjeje të aseteve dixhitale pa ndërmjetës.
Gjithashtu, kompania do të mund të operojë më lehtë në të gjithë territorin e SHBA-së pa qenë e detyruar të marrë miratime të veçanta nga autoritetet rregullatore të secilit shtet.
Procesi i miratimit u drejtua nga Zyra e Kontrollorit të Monedhës nën drejtimin e Jonathan Gould, i emëruar nga Trump, i cili kishte refuzuar më herët kërkesat e demokratëve për t’u tërhequr nga shqyrtimi i aplikimit ose për ta pezulluar atë.
Në letrën e miratimit, drejtori përgjegjës për licencimet bankare në OCC, Stephen Lybarger, theksoi se aplikimi ishte shqyrtuar sipas procedurave standarde dhe në përputhje me detyrimet ligjore dhe etike të institucionit.
