Michel Platini ka lëshuar akuza të forta ndaj ish-bashkëpunëtorit të tij në UEFA dhe presidentit aktual të FIFA-s, Gianni Infantino, duke e akuzuar se është i dhënë pas pushtetit dhe parave, ndërsa drejtuesit e sotëm të futbollit botëror i cilësoi si “burokratë të çmendur”.
Në një intervistë për emisionin “Canal Football Club”, të transmetuar mbrëmjen e së dielës, legjenda franceze foli hapur për marrëdhënien e tij me Infantinon dhe konfliktin që prej kohësh ka përfshirë dy ish-drejtuesit e UEFA-s.
Armiqësia mes tyre është zhvendosur tashmë edhe në gjykatat franceze. Që prej fillimit të verës, Platini ka ngritur një padi ndaj kreut të FIFA-s për “ushtrim të ndikimit të paligjshëm”, “komplot kriminal për shpifje” dhe “kallëzim të rremë”.
Megjithatë, përpara përplasjes së hapur, të dy kishin punuar për vite me radhë në drejtimin e futbollit europian. Nga viti 2007 deri në vitin 2015, Platini ishte president i UEFA-s, ndërsa Infantino shërbente si sekretar i përgjithshëm i organizatës.
Sipas ish-kapitenit të Francës, që në atë periudhë ai kishte vënë re ambicien e Infantinos për pushtet.
“Ai kishte pak nga kjo natyrë, por asokohe kishte një shef mbi kokë. Gjithmonë e kam ditur që i pëlqenin shumë paratë dhe pushteti”, deklaroi Platini.
Fituesi i trefishtë i Topit të Artë, në vitet 1983, 1984 dhe 1985, kritikoi gjithashtu mënyrën se si drejtohet sot futbolli ndërkombëtar. Sipas tij, protagonistët e vërtetë të këtij sporti nuk janë drejtuesit e institucioneve, por futbollistët që zbresin në fushë.
“Futbolli është një festë e mrekullueshme, ndeshjet janë ato që kanë rëndësi. Pjesa tjetër është thjesht politikë, një mikrokozmos njerëzish që mendojnë se janë bosët e futbollit. Por shefat e vërtetë janë Mbappé, Zidane, Maradona”, tha ai.
Platini vijoi më tej kritikat, duke i cilësuar drejtuesit e futbollit si burokratë që përfitojnë nga pozitat e tyre.
“Këta të tjerët janë thjesht burokratë që arrijnë në një pozicion, shijojnë lavdinë e paratë dhe më pas i humbasin ato. Ne kemi nevojë për lojtarë”, u shpreh francezi.
Deklaratat e tij vijnë ndërsa përplasjet rreth drejtimit të FIFA-s janë intensifikuar. Sipas raportimeve, UEFA po shqyrton mundësinë e një veprimi ligjor ndaj Infantinos në Zvicër për pretendime që lidhen me “menaxhim të pandershëm”.
Platini beson se çdo përpjekje për largimin e Infantinos nuk do të zgjidhet brenda strukturave sportive, por përmes drejtësisë.
“Nëse UEFA dëshiron ta rrëzojë Infantinon, kjo do të bëhet përmes gjykatave. Ai ka dështuar sepse duhej të ishte garantuesi i rregullave të lojës, por nuk i respektoi ato. Ai duhet të largohet!”, deklaroi ish-presidenti i UEFA-s.
Pavarësisht kritikave të forta ndaj drejtimit aktual të futbollit, Platini përjashtoi mundësinë e një rikthimi të tij në një post drejtues, qoftë në nivel klubesh apo në institucionet ndërkombëtare të sportit.
“Klubet apo organet drejtuese? Për mua kapitulli është i mbyllur”, përfundoi Platini.
