Presidenti amerikan Donald Trump ka pezulluar përkohësisht vendosjen e tarifave prej 50% ndaj një sërë mallrash kanadeze, vetëm pak orë përpara se masat të hynin në fuqi, pasi Shtetet e Bashkuara dhe Kanadaja arritën një marrëveshje paraprake tregtare.
Trump njoftoi se tarifat, të cilat parashikohej të hynin në fuqi në mesnatën e së mërkurës, do të shtyhen për tre ditë, ndërsa dy vendet punojnë për finalizimin e dokumenteve të marrëveshjes.
“Bazuar në faktin se Kanadaja dhe SHBA-ja, në varësi të finalizimit të dokumenteve, kanë një MARRËVESHJE!”, shkroi Trump në rrjetet sociale.
Presidenti amerikan la të kuptohet gjithashtu se pjesë e diskutimeve mund të jetë rikthimi i projektit Keystone XL, tubacioni i diskutuar prej vitesh që synon transportimin e naftës së papërpunuar nga Alberta e Kanadasë drejt rajoneve të Shteteve të Bashkuara.
Shtëpia e Bardhë nuk dha menjëherë hollësi të plota për përmbajtjen e marrëveshjes. Megjithatë, Zyra e Përfaqësuesit të SHBA-së për Tregtinë deklaroi se paketa pritet të përfshijë akses më të gjerë në treg për mallrat amerikane, angazhime për sigurinë ekonomike, harmonizim në tregtinë digjitale dhe dispozita për mbrojtjen e tregut dhe punëtorëve.
Carney konfirmon shtyrjen e tarifave
Kryeministri kanadez Mark Carney konfirmoi arritjen e përparimit në negociata, por theksoi se puna për marrëveshjen nuk ka përfunduar.
“Është bërë përparim i konsiderueshëm, megjithëse ka ende punë të rëndësishme për t’u bërë”, deklaroi Carney.
Sipas tij, SHBA-ja ka pranuar të shtyjë deri në fund të 21 gushtit zbatimin e tarifave prej 50% për një kategori mallrash kanadeze.
Nëse marrëveshja finalizohet, ajo do të shmangte një përshkallëzim të ri të luftës tregtare mes dy vendeve dhe mund t’i hapë rrugën diskutimeve më të gjera për të ardhmen e marrëveshjes SHBA-Meksikë-Kanada, USMCA.
Negociatorët amerikanë dhe kanadezë kanë zhvilluar bisedime intensive gjatë ditëve të fundit, me mosmarrëveshjet të përqendruara veçanërisht te tarifat amerikane për automjetet dhe politikat e Kanadasë për mbrojtjen e industrisë së saj të qumështit.
Trump dhe Carney zhvilluan një bisedë telefonike të hënën në mbrëmje dhe komunikuan përsëri të martën, në përpjekje për të arritur një kompromis përpara hyrjes në fuqi të tarifave.
Rrezikohej një përplasje e re tregtare
Tarifat prej 50% do të preknin rreth 20 miliardë dollarë mallra nga më shumë se 383 miliardë dollarë importe vjetore amerikane nga Kanadaja.
Mes produkteve që rrezikonin të prekeshin ishin pajisjet e hokejit dhe produktet e industrisë pyjore, ndërsa masat mund të shtonin edhe shqetësimet për rritjen e çmimeve në SHBA, më pak se tre muaj përpara zgjedhjeve të mesmandatit.
Grupet e biznesit mirëpritën vendimin për shtyrjen e tarifave, por kërkuan që Uashingtoni dhe Otava të finalizojnë sa më shpejt një marrëveshje afatgjatë.
Presidentja e Dhomës Kanadeze të Tregtisë, Candace Laing, paralajmëroi se shtyrja e tarifave nuk u jep bizneseve të njëjtën siguri që do të sillte një marrëveshje e nënshkruar.
Për momentin, dy vendet kanë vetëm pak ditë në dispozicion për të përfunduar negociatat dhe për të shmangur hyrjen në fuqi të tarifave prej 50%.
