Tensionet mes Shteteve të Bashkuara dhe Iranit janë përshkallëzuar sërish, pasi Uashingtoni ndërmori sulme të reja ajrore në orët e para të së dielës, në përgjigje të sulmit iranian ndaj një anijeje tregtare në Ngushticën e Hormuzit.

Komanda Qendrore e Ushtrisë Amerikane (CENTCOM) njoftoi se goditi rreth 140 objektiva ushtarake në Iran, përfshirë baza raketash dhe dronësh, kapacitete detare, si dhe depo municionesh. Sipas ushtrisë amerikane, operacioni ishte një kundërpërgjigje ndaj sulmit të Teheranit ndaj një anijeje tregtare në Hormuz një ditë më parë.

Nga ana tjetër, Trupat e Gardës Revolucionare Islamike (IRGC) deklaruan se kanë ndërmarrë sulme hakmarrëse ndaj objektivave amerikane në rajon. Sipas mediave iraniane, IRGC pretendon se ka shkatërruar një qendër komanduese dhe hangarë dronësh në Jordani, ka goditur një stacion radari amerikan në Kuvajt, platforma mbështetëse dhe furnizimi të një aeroplanmbajtëseje amerikane në Oman, si dhe një qendër mirëmbajtjeje avionësh dhe një strukturë komanduese në Katar.

IRGC paralajmëroi se çdo veprim i mëtejshëm ushtarak nga SHBA-ja do të përballet me një përgjigje edhe më të ashpër.

Përshkallëzimi ndodhi vetëm disa orë pasi ministri i Jashtëm iranian, Abbas Araghchi, zhvilloi një takim me homologun e tij nga Omani për të diskutuar mekanizma që do të garantonin kalimin e sigurt të anijeve në Ngushticën e Hormuzit.

Ndërkohë, kryenegociatori iranian, Mohammad Baqer Qalibaf, deklaroi se “epoka e marrëveshjeve të njëanshme ka përfunduar”, duke paralajmëruar se Irani do të reagojë nëse angazhimet e marra nuk respektohen.

Një ditë më parë, lideri suprem i ri i Iranit, Mojtaba Khamenei, u zotua se vendi do të hakmerret për vrasjen e babait të tij, ish-liderit suprem Ali Khamenei.

Ngushtica e Hormuzit mbetet një nga korridoret më strategjike të energjisë në botë, pasi përmes saj kalon rreth 20% e tregtisë globale të naftës dhe gazit natyror. Përshkallëzimi i ri i konfliktit ka shtuar shqetësimet për stabilitetin e tregjeve ndërkombëtare të energjisë dhe rrezikon të minojë armëpushimin e brishtë mes Uashingtonit dhe Teheranit.