Rusia po shfaq shenja se mund të jetë duke u përgatitur për një tjetër test të raketës eksperimentale me energji bërthamore Burevestnik, e njohur nga NATO si SSC-X-9 Skyfall dhe e pagëzuar në Perëndim me nofkën “Çernobili Fluturues”.
Lëvizje të pazakonta të aviacionit rus janë regjistruar ditët e fundit në Novaya Zemlya, arkipelagun e largët të Arktikut ku ndodhet poligoni Pankovo, i lidhur me programin e testimit të Burevestnik.
Imazhet satelitore tregojnë se dy avionë Il-976 SKIP kanë mbërritur në bazën ajrore Rogachevo. Avionë të këtij lloji përdoren për gjurmimin e trajektores së raketave, mbledhjen e të dhënave telemetrike dhe monitorimin gjatë testeve, përfshirë matjet e rrezatimit.
Në bazë është evidentuar gjithashtu prania e një avioni radar A-50U, katër avionëve transportues An-26, një An-74D dhe disa helikopterëve.
Aktivitet është konstatuar edhe në det. Në ujërat përreth Novaya Zemlya janë pozicionuar anije që besohet se mund të përdoren për monitorimin e testeve dhe operacionet e rikuperimit, ndërsa një pjesë e hapësirës ajrore mbi Detin Barents është kufizuar për fluturimet.
Megjithatë, këto zhvillime nuk konfirmojnë se një lëshim i Burevestnik është i afërt. Aktiviteti mund të lidhet edhe me përgatitje ose prova paraprake përpara një testi të mundshëm.
Çfarë është “Çernobili Fluturues”?
Burevestnik është një raketë lundruese eksperimentale ruse, e projektuar të përdorë një reaktor të vogël bërthamor për sistemin e shtytjes.
Në teori, kjo teknologji mund t’i sigurojë raketës një rreze jashtëzakonisht të madhe veprimi dhe mundësinë për të ndjekur trajektore më pak të parashikueshme, me synimin për të shmangur sistemet kundërshtare të mbrojtjes ajrore.
Por pikërisht teknologjia bërthamore që e dallon Burevestnik ka ngritur shqetësime të mëdha për sigurinë.
Ekspertët perëndimorë kanë paralajmëruar për rrezikun e çlirimit të materialeve radioaktive gjatë funksionimit ose në rast aksidenti. Një dështim gjatë testimit mund të shkaktojë gjithashtu ndotje radioaktive në zonën ku raketa do të rrëzohej.
Pikërisht këto rreziqe kanë bërë që arma eksperimentale ruse të marrë nofkën “Çernobili Fluturues”, ndërsa aktiviteti i fundit në Arktik po ndiqet nga afër për të kuptuar nëse Moska po përgatitet për një test të ri.
