Rumania i ka dorëzuar ambasadorit rus në Bukuresht mbetjet e dronëve të rrëzuar në hapësirën ajrore rumune gjatë fundjavës, duke akuzuar Moskën për shkelje të sovranitetit të saj dhe për përkeqësimin e situatës së sigurisë në rajon.
Sipas Ministrisë së Jashtme rumune, mes së premtes dhe të dielës autoritetet rrëzuan tre dronë të dyshuar rusë që kishin hyrë në hapësirën ajrore të vendit.
“Gjatë takimit, pala rumune theksoi se Federata Ruse mban përgjegjësinë e plotë për këto incidente të rënda dhe për përkeqësimin e mjedisit të sigurisë në rajon”, thuhet në deklaratën e ministrisë.
Bukureshti njoftoi gjithashtu se ka thirrur për konsultime ambasadorin e tij në Moskë.
Ministrja e Jashtme e Rumanisë, Oana Țoiu, deklaroi se bëhej fjalë për dronë të tipit “Shahed”, të përdorur nga Rusia, të cilët dyshohet se hynë në hapësirën ajrore rumune gjatë sulmeve ndaj porteve ukrainase në rajonin e Odesës, pranë kufirit me Rumaninë.
Presidenti rumun Nicușor Dan i cilësoi shkeljet e përsëritura të hapësirës ajrore si “të papranueshme dhe të patolerueshme”, duke theksuar se ato cenojnë sovranitetin e Rumanisë, si edhe hapësirën ajrore të NATO-s dhe Bashkimit Evropian.
Sipas autoriteteve rumune, hyrjet e dronëve rusë në hapësirën ajrore evropiane janë bërë gjithnjë e më të shpeshta gjatë vitit të fundit, ndërsa Rusia vijon sulmet ndaj Ukrainës.
Si pjesë e reagimit diplomatik, Rumania njoftoi gjithashtu se një punonjës i Ambasadës së Rusisë në Bukuresht është shpallur persona non grata dhe duhet të largohet nga vendi brenda pesë ditësh.
