Lideri i Partisë së Gjelbër në Britaninë e Madhe, Zack Polanski, ka njoftuar se synon të kandidojë në zgjedhjet e pjesshme për zonën Holborn and St Pancras në Londër, për të marrë mandatin parlamentar të lënë vakant nga ish-kryeministri Keir Starmer.
Polanski, i cili mori drejtimin e të Gjelbërve vitin e kaluar, deklaroi për “Camden New Journal” se dëshiron të përfaqësojë partinë në garën që pritet të zhvillohet në një zonë të konsideruar tradicionalisht si bastion i Partisë Laburiste.
“Kam jetuar dhe punuar në këtë komunitet për shumë vite, e njoh mirë dhe e dua. Ai përfaqëson shumë nga gjërat që e bëjnë Londrën kaq të veçantë. Jam shumë i emocionuar nga mundësia për ta përfaqësuar këtë zonë në Parlament”, deklaroi Polanski.
Keir Starmer dha dorëheqjen këtë javë si deputet, duke deklaruar se dëshiron t’i kushtojë më shumë vëmendje çështjeve ndërkombëtare. Ai ishte larguar më herët gjatë këtij viti edhe nga posti i kryeministrit, pasi humbi mbështetjen brenda partisë së tij, duke u zëvendësuar nga Andy Burnham.
Ende nuk është përcaktuar data e zgjedhjeve të pjesshme në Holborn and St Pancras.
Përpara se kandidatura e tij të zyrtarizohet, Polanski duhet të marrë mbështetjen e anëtarëve lokalë të Partisë së Gjelbër. Procesi i përzgjedhjes së kandidatit pritet të zhvillohet javën e ardhshme.
Duke dhënë sinjalet e para për mënyrën se si do ta ndërtojë fushatën, Polanski premtoi se votuesit do të kishin një përfaqësues që do të mbronte interesat e tyre pa iu nënshtruar presionit të donatorëve të mëdhenj apo disiplinës partiake.
“Shumë shpesh Partia Laburiste ka mbrojtur korporatat dhe paranë e madhe. Unë do të mbroj njerëzit që po luftojnë për të paguar faturat e tyre”, deklaroi ai.
Që prej marrjes së drejtimit të të Gjelbërve, Polanski ka mbikëqyrur një rritje të anëtarësisë së partisë dhe e ka udhëhequr atë drejt një rezultati të fortë në zgjedhjet lokale të majit. Megjithatë, ai është përballur edhe me kritika lidhur me procesin e verifikimit të kandidatëve dhe postimet e tij në rrjetet sociale.
Polanski është anëtar i Asamblesë së Londrës që prej vitit 2021, ku një prej roleve të tij është mbikëqyrja e punës së kryebashkiakut Sadiq Khan.
Në zgjedhjet e vitit 2024, Starmer e fitoi Holborn and St Pancras me një diferencë prej 11,572 votash, megjithëse u përball me një sfidë të fortë nga një kandidat i pavarur i së majtës dhe nga të Gjelbrit.
Kandidatura e mundshme e Polanskit pritet ta bëjë garën një test të rëndësishëm për laburistët, të cilët do të përpiqen të ruajnë një mandat që deri më tani është konsideruar relativisht i sigurt për partinë.
