Kryeministrja e Japonisë, Sanae Takaichi, ka shprehur kënaqësinë për vizitën zyrtare të kryeministrit shqiptar, Edi Rama, në Tokio, duke theksuar rëndësinë e forcimit të marrëdhënieve dypalëshe dhe zgjerimit të bashkëpunimit në fusha kyçe.
Në nisje të takimit mes dy delegacioneve, pas pritjes zyrtare, Takaichi deklaroi: “E mirëpres me zemër vizitën e Kryeministrit Rama, sot. Jam shumë e lumtur që kam mundësinë t’Ju takoj për herë të parë”.
Ajo nënvizoi se Shqipëria konsiderohet një partnere e rëndësishme për Japoninë, duke shtuar se të dy vendet ndajnë vlera dhe parime të përbashkëta që shërbejnë si bazë për një bashkëpunim afatgjatë.
“Ne jemi të kënaqur që negociatat e anëtarësimit të Shqipërisë në Bashkimin Europian po përparojnë në mënyrë të qëndrueshme”, tha Takaichi, duke konfirmuar mbështetjen e vazhdueshme të Japonisë për integrimin europian të Shqipërisë.
Sipas saj, në kuadër të Nismës së Bashkëpunimit me Ballkanin Perëndimor, Japonia do të vijojë të mbështesë fuqimisht këtë proces, duke e konsideruar stabilitetin e rajonit si një element kyç për sigurinë dhe zhvillimin ndërkombëtar.
Takaichi vlerësoi gjithashtu rolin e Shqipërisë në Ballkanin Perëndimor, duke theksuar kontributin aktiv në ruajtjen e stabilitetit në një rajon me histori komplekse.
“I shpreh respekt Shqipërisë për kontributin aktiv që jep në stabilitetin rajonal në Ballkanin Perëndimor”, u shpreh ajo.
Në fjalën e saj, kryeministrja japoneze falënderoi gjithashtu Shqipërinë për mbështetjen ndaj vizionit japonez për një Indo-Paqësor të lirë dhe të hapur, një strategji që synon rritjen e bashkëpunimit dhe qëndrueshmërisë në rajon.
“Këtë muaj, në përvjetorin e dhjetë të shpalljes së këtij vizioni, ne prezantuam versionin e përditësuar, duke vendosur autonominë dhe qëndrueshmërinë si dy elemente thelbësore, me synimin që i gjithë rajoni të bëhet më i fortë dhe më i begatë”, tha Takaichi.
Ajo theksoi se, në një kohë kur siguria e Europës, Atlantikut dhe Indo-Paqësorit po bëhet gjithnjë e më e ndërlidhur, Japonia synon të thellojë më tej bashkëpunimin me Shqipërinë në nivele strategjike.
