Ministri francez i Ekonomisë, Roland Lescure, deklaroi të enjten se objektivi i qeverisë për buxhetin e vitit të ardhshëm është ruajtja e një “deficiti publik të qëndrueshëm”, ndërsa situata ekonomike dhe politike po e bëjnë gjithnjë e më të vështirë uljen e tij.
Fillimisht, qeveria synonte që deficiti për vitin 2027 të zbriste nën 5% të Prodhimit të Brendshëm Bruto, nivel që vlerësohet të arrihet këtë vit. Objektivi i diskutuar për projektbuxhetin ishte rreth 4.9% e PBB-së.
Megjithatë, parashikimet e zymta ekonomike dhe fragmentimi i Parlamentit francez po e komplikojnë strategjinë e konsolidimit të financave publike. Në këto kushte, bëhet më i vështirë edhe realizimi i angazhimit të Francës për ta ulur deficitin nën kufirin prej 3% të PBB-së deri në vitin 2029, në përputhje me rregullat e Bashkimit Evropian.
Duke folur në një takim të nivelit të lartë me drejtues të biznesit, të organizuar nga organizata e punëdhënësve francezë Medef, Lescure tha se qeveria po punon për të garantuar “stabilitet” gjatë muajve të ardhshëm.
Sipas ministrit, ekzekutivi nuk planifikon rritje të taksave, ndërsa synon të reduktojë më tej shpenzimet e administratës publike.
Lescure konfirmoi gjithashtu se po shqyrtohet mundësia e një ngrirjeje të pjesshme të pensioneve, si një prej masave për të mbajtur nën kontroll deficitin.
Përpjekjet për hartimin e buxhetit të vitit 2027 pritet të përballen edhe me një betejë të fortë politike. Parlamenti mbetet i fragmentuar dhe partitë opozitare kanë pak gjasa të bashkëpunojnë me qeverinë, ndërsa Franca po hyn gjithnjë e më shumë në klimën e fushatës për zgjedhjet presidenciale të vitit 2027.
Kandidati i së majtës radikale, Jean-Luc Mélenchon, ka paralajmëruar tashmë se forca e tij politike po përgatitet për një mocion mosbesimi ndaj qeverisë lidhur me projektbuxhetin.
