Presidenti turk Recep Tayyip Erdogan ka deklaruar se anëtarësimi i Turqisë në Bashkimin Evropian nuk përbën më një prioritet për Ankaranë, megjithëse vendi nuk ka hequr dorë përfundimisht nga synimi për t’u bërë pjesë e bllokut.
“Bashkimi Evropian nuk është prioritet për ne”, deklaroi Erdogan gjatë një interviste për televizionin Al Jazeera.
Presidenti turk theksoi se Ankaraja vazhdon ta mbajë të hapur mundësinë e anëtarësimit, por procesi nuk zë më një vend qendror në politikën e vendit.
Sipas Erdogan, nëse BE-ja vazhdon ta mbajë Turqinë jashtë bllokut, atëherë vetë Unioni do të jetë pala që do të humbasë.
Turqia mban statusin e vendit kandidat për anëtarësim në Bashkimin Evropian që prej vitit 1999, ndërsa negociatat zyrtare nisën në vitin 2005.
Megjithatë, procesi ka mbetur praktikisht i ngrirë prej vitesh, mes shqetësimeve dhe kritikave të BE-së lidhur me demokracinë, shtetin e së drejtës dhe respektimin e të drejtave themelore në Turqi.
Deklaratat e Erdogan vijnë në një periudhë kur qeveria turke po përballet me kritika të shtuara për veprimet ndaj opozitës.
Në qendër të vëmendjes është çështja e Ekrem Imamoglu, ish-kryetarit të Bashkisë së Stambollit dhe një prej rivalëve më të rëndësishëm politikë të Erdogan.
Gjyqi ndaj Imamoglu pritet të vazhdojë në gjykatën e Silivrit në Stamboll. Ai përballet, ndër të tjera, me akuza për korrupsion, pastrim parash dhe krijimin e një organizate kriminale.
Opozita turke pretendon se procesi gjyqësor është i motivuar politikisht dhe akuzon Erdogan se po përdor sistemin e drejtësisë për të eliminuar një prej rivalëve të tij kryesorë.
Qeveria turke i ka hedhur poshtë këto pretendime dhe mohon se ndërhyn në sistemin gjyqësor.
