Bashkimi Evropian do të përdorë 1.4 miliardë euro nga të ardhurat e krijuara prej aseteve të ngrira të Bankës Qendrore të Rusisë për të mbështetur Ukrainën, njoftoi të martën Komisioni Evropian.
Sipas Komisionit, fondet vijnë nga interesi i gjeneruar mbi bilancet e parave të gatshme që lidhen me asetet ruse të ngrira nga Bashkimi Evropian pas nisjes së pushtimit të Ukrainës nga Rusia.
Presidentja e Komisionit Evropian, Ursula von der Leyen, deklaroi se Rusia duhet të mbajë përgjegjësi financiare për dëmet e shkaktuara nga lufta.
“Rusia duhet të paguajë për shkatërrimin që ka shkaktuar. Dhe ne po përdorim të ardhurat nga asetet e ngrira ruse për të siguruar që ta bëjë këtë”, u shpreh von der Leyen.
Ajo bëri të ditur se Bashkimi Evropian po vë në dispozicion të Ukrainës edhe 1.4 miliardë euro të tjera nga këto të ardhura, me synimin për të forcuar kapacitetet e vendit përballë agresionit rus.
“Po i vëmë në dispozicion Ukrainës edhe 1.4 miliardë euro të tjera nga kjo shumë. Kjo do të mbështesë rezistencën e vazhdueshme të Ukrainës kundër luftës së paligjshme të Rusisë”, deklaroi presidentja e Komisionit Evropian.
Që prej fillimit të luftës, Bashkimi Evropian dhe partnerët e tij kanë ngrirë qindra miliarda euro asete të Bankës Qendrore ruse. Ndërsa asetet kryesore mbeten të bllokuara, të ardhurat e krijuara prej tyre po përdoren gradualisht për të financuar mbështetjen ushtarake, ekonomike dhe rindërtimin e Ukrainës.
Komisioni Evropian e konsideron këtë mekanizëm një mënyrë për të siguruar që Rusia të kontribuojë në kostot e luftës që ka shkaktuar, pa prekur drejtpërdrejt kapitalin bazë të aseteve të ngrira. Fondet e reja pritet të përdoren për të mbështetur nevojat urgjente të Ukrainës dhe për të forcuar aftësinë e saj për të përballuar pasojat e konfliktit.
